Tórt adam «Oral qalasynyń qurmetti azamaty» atandy
ORAL. QazAqparat - Búgin tórt adamǵa «Oral qalasynyń qurmetti azamaty» ataǵy berildi, dep habarlaıdy «QazAqparat» tilshisi.
Oral qalalyq máslıhatynyń kezekten tys 17-sessııasynda qala ákimi Murat Muqaev Qalam Súıinshálıevke, Merýert Joldyqaıyrovaǵa, Nıkolaı Baımuqashevqa jáne ıAhııa Chýdrovqa marapattaryn tapsyrdy.
Soǵys jáne eńbek ardageri Qalam Súıinshálıev pen zeınetker-ustaz Merýert Joldyqaıyrova kóp jyldar boıy Oral pedagogıkalyq ınstıtýtynda (qazir M.Ótemisov atyndaǵy Batys Qazaqstan memlekettik ýnıversıteti) eńbek etip, bilim salasy men urpaq tárbıesine óz úlesterin qosty. Rejısser Nıkolaı Baımuqashev teledıdar men mádenıet salasyna eńbek sińirse, ıAhııa Chýdrov uzaq ýaqyt «Batys Qazaqstan elektr jelilerin taratý kompanııasyn» basqardy.
