«Torpedo» shaıbaly hokkeıden Kontınentaldyq kýbok oıyndaryna qatysatyn boldy

ASTANA. KAZINFORM - Aldaǵy maýsymda shaıbaly hokkeıden Kontınentaldyq kýbok oıyndaryna elimizdiń atynan Óskemenniń «Torpedo» komandasy qatysatyn boldy.

Bul sheshimdi Halyqaralyq hokkeı federatsııasy qazaqstandyq «Arlan» (Kókshetaý) komandasynyń ótken maýsymda jarysqa qatysýdan bas tartqany úshin qabyldap otyr. Sondyqtan kókshetaýlyq komanda jarystan shettetildi.

Aldaǵy ýaqytta týrnır jańa formatta ótkiziledi. Bul joly «Torpedo» alty komandamen birge saıysty ekinshi kezeń jartylaı fınaldan bastaıdy. Jarystyń atalǵan satysynda Polshanyń «Katovıtse», Ulybrıtanııanyń «Nottıngem Panters», ótken maýsymnyń kúmis júldegeri atanǵan Danııanyń «Hernıng Blıý Foks» jáne 2023 jyly fınalǵa shyqqan Frantsııanyń «Dıýk d’Anje» komandalary oıyn kórsetedi.

Qalǵan 8 komanda jarysty birinshi irikteý kezeńinen bastaıdy. Eki irikteý tobyndaǵy jeńimpazdar qarasha aıynda ótetin jartylaı fınalǵa joldama alady.

Kontınentaldyq kýboktyń fınaly 2026 jyldyń 15-18 qańtary aralyǵynda ótedi. Oǵan tórt komanda qatysady.

Atalǵan týrnır Halyqaralyq shaıbaly hokkeı federatsııasy aıasynda 1997 jyldan beri turaqty túrde ótkizilip keledi.

Qazirge deıin elimizdiń atynan qatysqan Kókshetaýdyń «Arlan» komandasy 2018/2019 jylǵy týrnırde bas júldeni jeńip aldy.

Ár jyldarda «Beıbarys» (Atyraý), «Saryarqa» (Qaraǵandy), «Nomad» (Astana) ekinshi orynǵa jaıǵassa, «Qaztsınk-Torpedo» (Óskemen) qola júldeger atanǵan edi.