Torǵaıdaǵy Shaqshaq Jánibek mýzeıi basqa jaqqa kóshirilýi múmkin
QOSTANAI. QazAqparat - Shaqshaq Jánibek mýzeıi Torǵaıdan Qostanaıǵa kóshirilýi múmkin. Oblys ákimdiginde ótken apparat májilisinde osy taqyryp talqyǵa tústi, dep habarlaıdy QazAqparat.
Qazaqsannyń uzaqmerzimdi mádenı saıasatynyń tujyrymdamasynda qazirgi zamanǵy mádenı klasterlerdi damytý maqsaty jazylǵan. Aty atalǵan tujyrymdamany iske asyrý aıasynda Á.Jangeldın mýzeıler keshenin jóndeý kózdelgen. Qazirgi ýaqytta aýdanda tórt derbes mýzeı bar. Oblystyq mádenıet basqarmasynyń basshysy Erlan Qalmaqovtyń sózinshe, bıyl A.Baıtursynov jáne M. Dýlatov mýzeıinde jylý júıesi qalpyna keltirildi.
«2015 jyldan bastap memlekettik áleýmettik tapsyrys boıynsha oblys aýmaǵyndaǵy arheologııalyq eskertkishterdi zerdeleý jumystary júrgizilip jatyr. Eki jyl ishinde 418 arheologııalyq nysan zerttelip, júıelendi. Tizimdegi 122 eskertkish Á.Jangeldın aýdanynda ornalasqan. Búginde Torǵaıdaǵy Shaqshaq Jánibek mýzeıi men Arqalyq qalasynda Dala ólkesi tarıhy mýzeıine kúrdeli jóndeý júrgizý úshin jobalyq smetalyq qujattamalar ázirlengen. Osy nysandar boıynsha ótinimder bıýdjettik komıssııanyń qaraýynda jatyr», - dedi Erlan Qalmaqov.
Oblys ákimi Arhımed Muhambetovtiń aıtýynsha, aýyl aqsaqaldary Torǵaıdaǵy Shaqshaq Jánibek mýzeıin oblys ortalyǵyna kóshirý týraly bastama kóterdi.
«Rasyn aıtý kerek, mýzeı kóshirý ońaı jumys emes. Ol qanshalyqty tıimdi, sony eskergen jón. Mádenıet basqarmasy basshylyǵyna bir aıdyń ishinde osy jóninde usynys engizýge tapsyrma beremin. Jádigerlerdi Qostanaı qalasyna ma, bálkim Zatobol kenti nemese mańaıdaǵy aýdandarǵa kóshirý kerek pe, osyny qarap shyǵyńyzdar. Aldymen murajaı jasaqtaıtyn bos ǵımarat izdeý kerek. Qazirgi Shaqshaq Jánibek eskertkishi mańynda bolsa, ótetin sharalarǵa tıimdi. Bul naýqanǵa jumsalatyn shyǵyn eseptelsin. Keıin mýzeıdi kóshirý-kóshirmeý týraly sheshim shyǵady», - dedi A.Muhambetov.
Búgingi tańda Qostanaı oblysynyń aýmaǵynda 725 tarıh jáne mádenı eskertkish bar, onyń 5-i respýblıkalyq (Y. Altynsarın eskertkishi, Ekidiń I jáne Ekidiń II ǵuryptyq qurylystary) jáne 720-sy jergilikti mańyzǵa ıe.
Qazirgi ýaqytta jańadan anyqtalǵan arheologııalyq eskertkishterdi jergilikti mańyzy bar tarıh jáne mádenıet eskertkishteriniń memlekettik tizimine engizý jumystary júrgizilýde.
Foto: liter.kz
