Torǵaıdaǵy jol, baılanys, áleýmettik túıtkilder Májilis minberinde kóterilmek
ASTANA. KAZINFORM – Májilis depýtaty Qazybek Isa Qostanaı oblysyna jumys saparymen baryp, birqatar eldi meken turǵyndarymen kezdesti. Sapar barysynda ol jergilikti halyqtyń áleýmettik-turmystyq jaǵdaıymen tanysyp, ózekti máselelerin tyńdady.
Qazybek Isa birtýar tulǵa, Alash qozǵalysy jetekshileriniń biri, aqyn-aǵartýshy Mirjaqyp Dýlatulynyń 140 jyldyǵyna baılanysty aldymen Jangeldi aýdany Bıdaıyq aýylyna baryp, Ult kósemi kesenesine bardy. Budan soń qazirgi ýaqytta boı kóterip jatqan murajaı qurylysymen tanysty. Bul nysan ult qaıratkeriniń ómiri men eńbegine arnalǵan tarıhı-mádenı ortalyqqa aınalmaq.
Sapar barysynda Májilis depýtaty Bıdaıyq aýylynyń turǵyndarymen kezdesti. Aýyl turǵyndary kóterme joldardyń sapasy, ishki kóshelerge asfalt tóseý, ınternet pen uıaly baılanystyń álsizdigi sekildi máselelerdi kóterdi.
– Kóterilgen barlyq másele bizdiń jiti nazarymyzda. Bul turǵyndardyń turmys sapasyna tikeleı áser etetin mańyzdy túıtkilder bolǵandyqtan, tıisti memlekettik organdarǵa joldanyp, óz deńgeıinde sheshimin tabýy úshin baqylaýǵa alynady, – dedi Qazybek Isa.
Odan ári depýtat Aqkól aýylyna arnaıy baryp, aýyl murajaıynyń jumysymen tanysyp, jergilikti turǵyndarmen kezdesti. Jıynda aýylishilik joldardyń jaı-kúıi, baılanys jelisiniń álsizdigi, áleýmettik nysandardyń jaǵdaıy sóz boldy.
Sonymen qatar Qazybek Isa Amangeldi aýdanyna baryp, Uly dala tulǵalary kesheninde aýdannyń ardagerlerimen kezdesti. Olardyń usynys-tilekteriniń Parlamentte qozǵalatynyn jetkizdi.
Jumys saparynyń sońynda Qazybek Isa Qostanaı qalasyndaǵy «Qostanaı tańy» gazetiniń redaktsııasyna baryp, shyǵarmashylyq ujymmen jáne óńirge belgili qalamger-jýrnalıstermen júzdesti. Depýtat BAQ-tyń qoǵamdaǵy orny men eldik múddeni qorǵaýdaǵy róline toqtalyp, aqparat salasynda eńbek etip júrgen mamandarǵa tabys tiledi.
Depýtat sapar barysynda aıtylǵan máselelerdi Májilis qabyrǵasynda kóterip, quzyrly organdardyń qaraýyna usynatynyn jetkizdi.
Aıta keteıik, Torǵaı dalasynda kerqulandar qaıta mekendeı bastaǵanyn jazǵanbyz.