Torǵaıda kolledj ashylady
QOSTANAI. QazAqparat - Jangeldın aýdany ortalyǵy Torǵaı selosynda kópsalaly kolledj ashylady. Bul týraly aýdan ákimi Shota Ospanovtyń halyq ókilderimen esep berý kezdesýinde aıtyldy, dep habarlaıdy QazAqparat.
Oblys ortalyǵynan shalǵaı ornalasqan Jankeldın aýdany jyldy jaqsy jańalyqtarmen bastady. Jaqynda Torǵaı aýylynda kópsalaly kolledj ǵımaratynyń qurylysy aıaqtalady. Osylaısha, bıylǵy 1 qyrkúıekten bastap 9-synypty bitirgen oqýshylarǵa kásiptik bilim alýǵa múmkindik týady. Buǵan qosa óńirde zamanaýı sporttyq 3 oıyn alańy paıdalanýǵa berilmek. Aýdan ortalyǵyndaǵy 50 oryndyq ınternat ta jańartylyp jatyr.
«Aýdan ekonomıkasyn ilgeriletý úshin jeke ınvestorlardy tartý jumystary joǵarǵy dárejede júrip jatyr. Esepti kezende negizgi kapıtalǵa ıgerilgen ınvestıtsııa kólemi 824 mln teńgege jetti, naqty kólem ındeksi 108,3 paıyzdy qurady. Máselen, Torǵaı aýylynda kópsalaly kolledj qurylysynyń tolyqtaı aıaqtalýyna Spabekovter áýleti qoldaý bildirdi. Olar 60 mln teńge qarjylaı kómek berip, qurylys jumystaryn jandandyrdy. Munyń syrtynda 28 mln teńgege Aralbaı aýylynda shaǵyn fýtbol alańyn ashty», - dedi aýdan ákimi óz baıandamasynda.
Jıynǵa qatysqan oblys ákimi Arhımed Muhambetov atap ótkendeı, jańa nysandar salý arqyly jumyssyzdyq máselesin sheshýge bolady. Jankeldın aýdanynda 2018 jyldyń 1 qańtaryndaǵy málimet boıynsha, 116 jumys orny ashyldy. Byltyrdan beri aýdanda 578 adam jumyspen qamtylyp, jumysqa ornalastyrý deńgeıi 97,8 paıyzdy quraǵan.
