Torǵaı óńirinde jaılaýdaǵy mal sharýashylyǵyn damytýǵa 6 paıyzdyq nesıe bólinedi

ASTANA. KAZINFORM — Aýyl sharýashylyǵy mınıstriniń orynbasary Amanǵalı Berdalın ortalyq kommýnıkatsııalar qyzmetinde ótken baspasóz máslıhatynda Mal sharýashylyǵyn damytýdyń keshendi jospary aıasynda aýyl halqyna kórsetiletin qoldaý túrlerin atady.

— Birinshiden, mal sharýashylyǵynyń barlyq baǵyttary boıynsha aınalym qarajatyn tolyqtyrý úshin 5% jeńildikpen nesıe berý baǵdarlamasy iske qosylady, — dedi Amanǵalı Berdalın.

Mınıstrliktiń málimeti boıynsha bul baǵdarlamany iske asyrý úshin 450 mlrd teńge qajet. Onyń ishinde 150 mlrd teńgesi qazirdiń ózinde bıýdjette qarastyrylǵan. Osyǵan qosymsha 300 mlrd teńge kerek degen sóz.

— Ekinshiden, tórt túliktiń bárine asyl tuqymdy mal basyn satyp alýǵa 6%-ben uzaq merzimdi jeńildikti kredıt berý baǵdarlamasy iske asyrylady (jalpy qajettilik — 240 mlrd teńge, onyń ishinde 120 mlrd teńge, qosymsha qajettilik — 120 mlrd teńge), — dedi vıtse-mınıstr.

Keshendi jospar aıasynda Qostanaı oblysynyń Torǵaı óńiri men Ulytaý oblysynda jaılaýǵa kóship mal baǵatyndarǵa 6%-dyq nesıe beriletini aıtyldy.

— Bul nesıe jaıylymdardy qorshaý, sýarý júıesin tartý sııaqty ınfraqurylym jobalaryna jumsalý kerek, — dedi Amanǵalı Berdalın.

Eske salsaq, beısenbide ótken Úkimet otyrysynda Premer-mınıstr Oljas Bektenov Torǵaı óńirine qajetti qarajat bólýdi tapsyrǵan edi.