Torǵaı óńirin damytý baǵytynda ne josparlanǵan

ASTANA. KAZINFORM — Qostanaı oblysynyń ákimi Qumar Aqsaqalov Torǵaı óńiriniń áleýmettik-ekonomıkalyq damýyna túsinik berdi. 

— Bıyl Memleket basshysy Qazaqstan halqyna Joldaýynda Torǵaı óńiriniń áleýmettik-ekonomıkalyq damýy Úkimettiń nazarynda bolýy tıis ekenin erekshe atap ótti. Osyǵan baılanysty qazirgi ýaqytta Arqalyq qalasyn, Amangeldi jáne Jangeldın aýdandaryn aldaǵy úsh jyldyq kezeńde áleýmettik-ekonomıkalyq damytý jónindegi jospar bekitildi. Ol jalpy somasy 165,5 mlrd teńge bolatyn 51 is-sharadan turady. Qujat óńirdi damytýdyń basym salalyq mindetterin jedel sheshýge baǵyttalǵan, — dedi Qumar Aqsaqalov Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, Arqalyq qalasynda mańyzdy ınfraqurylymdyq joba — áýejaı qurylysy júzege asyrylyp jatyr. Búginle termınal ǵımaraty salynyp jatyr, ınjenerlik kommýnıkatsııalar júrgizildi. Jobany 2026 jylǵy shildede aıynda aıaqtaý josparlanǵan.

— Sondaı-aq, osy jyldyń maýsym aıynda «Ortalyq — Batys» baǵyty boıynsha ótetin mańyzy joǵary kólik dáliziniń qurylysy resmı bastaldy. Jańa baǵyt joldy 549 km qysqartady. Qazaqstannyń ońtústik óńirlerine tikeleı shyǵýdy qamtamasyz etetin «Jezqazǵan — Arqalyq — Petropavl» avtojolyn jóndeý boıynsha jumystar kelesi jyly bitedi, — dedi óńir ákimi.

Eske salsaq, jaqynda Úkimet otyrysynda Premer-mınıstr Oljas Bektenov Torǵaı óńirine qajetti qarajat bólýdi tapsyrdy.

Aıta keteıik, Qostanaı oblysynda «Ortalyq — Batys» avtojol dáliziniń qurylysy bastaldy.