Torǵaı geoglıfteri qorshalady
QOSTANAI. QazAqparat - Oblys ákimdiginiń kezekti apparat májilisinde Qostanaı oblysynyń týrızmin damytý máseleleri qaraldy, dep habarlaıdy QazAqparat tilshisi.
Oblystyq kásipkerlik jáne ındýstrııaldy-ınnovatsııalyq damý basqarmasynyń basshysy Isa Qudabekovtiń aıtýynsha, bıyl týrızmdi damytýǵa arnalǵan negizgi jospar jasaldy. Buǵan jergilikti bıýdjetten 43 mln teńge qarastyrylyp otyr. Barlyǵy 25 is-shara júzege aspaq.
«2018 jyly Amankeldi aýdany aýmaǵyndaǵy Torǵaı geoglıfterin qorshaýǵa 17 mln teńge bólinedi. Qazir bul másele mádenıet basqarmasynyń qaraýynda. Budan basqa 5 ınvestıtsııalyq jobany qolǵa aldyq. Amankeldi, Jankeldın, Meńdiqara, Qostanaı, Qarasý, Naýryzym aýdandarynda týrısterge arnalǵan servıs júıesi qurylady», - dedi I. Qudabekov.
Bul ıdeıany oblys ákimi Arhımed Muhambetov te qoldady. Degenmen, oblys týrızmin damytýǵa basqa da aýdandardyń atsalysýyn tapsyrdy.
«Oblys tabıǵaty ańshylyqqa qolaıly, biraq zańsyzdyqqa jol berilmeýi tıis. Barlyq jerde qyzmet kórsetý sapasyn arttyryp, jol boıyndaǵy dámhana, qonaq úıler sanyn arttyrǵan jón. Memlekettik jáne jekemenshik áriptestikti damytý qajet. Bizdiń oblys arqyly halyqaralyq mańyzy bar joldar ótedi. Basqa oblystarǵa qarap, úlgi alyńyzdar. Servıstik nysandardy kóbeıtýdi qolǵa alý kerek»,-dedi Arhımed Muhambetov.
