Torǵaı geoglıfteri arqyly Qostanaı týrızmin órkendetýge bolady -ǵalym
QOSTANAI. QazAqparat - Qostanaıdaǵy halyqaralyq ınvestıtsııalyq forým barysynda Torǵaı geolıfterin týrıstik maqsatta paıdalaný usynyldy, dep habarlaıdy QazAqparat tilshisi.
Jangeldın, Amankeldi, Arqalyq óńirlerindegi Torǵaı geoglıfterinen búgindeı jer júzi habardar. Aǵashtykól degen eldi mekennen qozykósh jerde ǵana «Torǵaı svastıkasy» jatyr. 2007 jyly tanymal arheolog Dmıtrıı Deı Torǵaı óńirindegi túrli sıpattaǵy ejelgi nysandardy ǵaryshtan túsirilgen sýretterden tapqan bolatyn. «Torǵaı svastıkasy» úshaıyryq (trıskelıon) bir núkteden shyqqan úsh tarmaqty sáýlelerden turady. Mamandardyń esepteýinshe, ol barlyǵy 5375 sharshy metr kólemdi alyp jatyr. Bir núkteden shyǵyp, úsh tarmaqqa bólinetin ejelgi nysannyń ortasyndaǵy sheńberdiń dıametri - 4 metr.
«Búginde kópshilikke tanymal geoglıfter Perýdiń ońtústigindegi Naska ústirtinde ornalasqan. Al Torǵaı geoglıfteri týraly anyqtaǵan meniń málimetterim Pıttsbýrg Ýnıversıteti men Eskendir kitaphanasynyń resmı saıtynda jarııalandy. Osydan eki jyl buryn meniń shaǵyn suhbatym «The New York Times» gazetine shyqty. Sodan bastap sheteldik ǵalymdar habarlasa bastady. Degenmen, Torǵaı oıpaty týraly derekter kóp bolǵanymen ony álemdik aqparat kózderine shyǵarý jaǵy áli de aqsap tur. Mine, osy týrıstik kórmede sheteldik áriptesterge Torǵaı geoglıfteri týraly aıttym. Keıbiri qyzyǵýshylyq tanytty», - dedi Dmıtrıı Deı.
Dmıtrıı Deıdiń aıtýynsha, Torǵaı geoglıfteri arqyly Qostanaı týrızmin órkendetýge bolady.
«Pıttsbýrg Ýnıversıtetiniń professory Ronald Laporttyń esepteýinshe, geoglıfter arqyly týrızmdegi kiristi jylyna 240 mln AQSh dollaryna ulǵaıtýǵa bolady. Ol úshin sheteldik týrısterdiń qyzyǵýshylyǵyn arttyrý kerek», - dedi ol.
QR Mádenıet jáne sport vıtse-mınıstri Asqar Batalov Qostanaı oblysy tóńiregindegi geoglıfterdi paıdalana otyryp, týrıstik aımaq qurýdy usyndy. Sondaı-aq, vıtse-mınıstr memlekettik-jekemenshik áriptestik salasynda da kóptegen jobany birlese otyryp, qolǵa alýǵa bolatynyn aıtty.
Onyń pikirinshe, Qazaqstanda ańshylyq-trofeılik týrızm damymaı jatyr. Endi Qostanaı oblysynda týrıstik ań aýlaý aımaǵyn jasaý úshin 300 ga alqap bólinetin bolady.
Batyr Jolaıuly
