Torǵaı, Ertis, Aral aýmaǵynda munaı qoryn barlaý jumystary júrgiziledi

NUR-SULTAN. QazAqparat – QR Ekologııa, geologııa jáne tabıǵı resýrstar vıtse-mınıstri Serikqalı Brekeshev Kapsıden alys aýmaqtardan munaı oryndaryn barlaý jumystary qolǵa alynatynyn málim etti, dep habarlaıdy QazAqparat tilshisi.

«Búgingi kúni elde óndiriletin munaı men gazdyń barlyq kólemi 5 basseınde ıgeriledi. Olardyń ishinde Kaspıı mańynyń úlesi orasan. Barlyq rersýrstyq bazanyń shamamen 80%-y Kaspıı mańyna tıesili. Soltústik Torǵaı, Ertis óńiri, Aral, Syrdarııa, Shý-Sarysý basseınderiniń de áleýeti zor dep esepteledi. Biraq bul basseınder az zerttelgen. Olardyń naqty áleýetin zerdeleý úshin ınvestorlardy tartyp, memlekettik qoldaý kórsetý qajet», - dedi Serikqalı Brekeshev ortalyq kommnıkatsııalar qyzmetinde ótken brıfıngide.

Onyń aıtýyna qaraǵanda, atalǵan kenishterdi zertteýge qyzyǵýshylyq tanytýshylardyń alǵashqy legimen kelissózder bastalyp ketken.

«Osyǵan baılanysty, yntymaqtastyq týraly 2 memorandým jasaldy. Bizdiń mınıstrlik, «Qazgeologııa» jáne «QazMunaıGaz» AQ el aýmaǵynyń geologııalyq zerttelýin arttyrý jáne az zerttelgen shógindi basseınderdi ıgerý salasynda memorandým jasasty. «Adjıp Kaspıan Sı B.V» kompanııasymen de osyndaı úshjaqty memorandým bekitildi», - dedi vedomstvo ókili.

Sondaı-aq, ol sheteldik ınvestorlarǵa naqty reglamenttelgen tártippen áleýetti ken oryndaryn barlaýǵa ruqsat berý máselesi pysyqtalǵanyn atady.

«Osylaısha, ınvestor jer qoınaýyna geologııalyq zertteý júrgize alatyndaı aıryqsha quqyq alady. Bul tásil ınvestıtsııalardyń neǵurlym joǵary quqyqtyq qorǵalýyn jáne turaqtylyǵyn qamtamasyz etedi. Sonymen birge, jer qoınaýyn memlekettik zertteýdi jáne jeke ınvestıtsııalardy bıýdjettik qarjylandyrýdy ulǵaıtý qajet, bul paıdaly qazbalardyń ken oryndaryn izdestirýdiń perspektıvalyq baǵyttaryn aıqyndaýǵa múmkindik beredi», - dedi mınıstrdiń orynbasary.