Torǵaı dalasynyń qulandary týraly komıks shyqty
ASTANA. QazAqparat - QR Aýyl sharýashylyǵy mınıstrligi Altynemel qulandaryn Torǵaı dalasyna jersindirý týraly komıks shyǵardy, dep habarlaıdy QazAqparat tilshisi.
«Byltyr Altynemel ulttyq parkinen Altyn-Dala rezervatyna 9 qulandy kóshirgen bolatynbyz. Sol kezde biz úshin úlken qaýiptiń biri brakonerlik boldy. Onyń aldyn alý úshin jergilikti halyqpen kezdesip, bul jobanyń Torǵaı dalasyna mańyzdylyǵyn túsindirdik. Qalyń jurt bul isimizdi quptap, ózderi qorǵaýǵa, saqtaýǵa ynta bildirdi», - dep jazdy QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet Feısbýktegi paraqshasynda jazdy.
Onyń aıtýynsha, qulandar jergilikti mektep oqýshylary úshin úlken jańalyq bolǵan.
«Entsıklopedııanyń tilimen emes, zamanaýı tilmen mektep oqýshylaryna arnap qazaq tilinde komıks shyǵardyq.Bir jaǵynan balalardy qulannyń tabıǵatymen tanystyrsaq, ekinshi jaǵynan ony qorǵaýǵa, saqtaýǵa úndeý bildirdik. Bizdiń basty oıymyz - janýarlar dúnıesiniń mańyzdylyǵyn túsingen bala, tabıǵatqa qııanat jasamaıdy», - deıdi S. Dildahmet.
Mınıstrlik ókiliniń habarlaýynsha, qazirgi ýaqytta qulandar Torǵaı dalasyna úırenip, aman-esen jersinip ketti.
