Torǵaı dalasyna jiberilgen qulandy brakonerler atyp ketti
NUR-SULTAN. QazAqparat - 2018 jyly dalaǵa jiberilgen qulandardyń biri Qostanaı oblysyndaǵy «Tasty» sharýashylyǵynan tabyldy. Ony brakonerler atyp ketken.
Bul týraly Qazaqstandyq bıoalýandylyqty saqtaý qaýymdastyǵy Facebook paraqshasynda jazdy, dep habarlaıdy QazAqparat.
Janýardyń bólikterin Qazaqstandyq bıoalýandylyqty saqtaý qaýymdastyǵynyń ókilderi tapty. Olar qulannyń moınyna taǵylǵan GPS habar beretin qurylǵynyń eshqandaı belgi bermegeninen kúdiktengen. Osyǵan baılanysty olar qurylǵyny izdemek bolyp, 26 jeltoqsan kúni saparǵa shyqqan.
Janýar óltirilgen jerdi qaraǵanda, onda qulannyń basy men óte uqyptylyqpen kesilgen GPS qurylǵysynyń baýy tabylǵan. Sol jerden kólik izi de tabyldy. Qulannyń bul analyǵyn sońǵy ret 14 jeltoqsan kúni kórgen.
Qulannyń óltirilgeni týraly habar Qostanaı oblysy Arqalyq qalalyq prolıtsııa basqarmasyna jiberildi. Qazirgi tańda osy jaǵdaı boıynsha, «qyzyl kitaptaǵy janýarǵa» brakonerlik jasady degen bappen qylmystyq is qozǵalyp, tergeý bastaldy.
Osy jáne taǵy 8 qulan 2018 jyly QR Ekologııa, geologııa jáne tabıǵı resýrstar mınıstrliginiń Orman sharýashylyǵy jáne janýarlar álemi komıtetimen, sondaı-aq Ortalyq Qazaqstanda qulandardyń popýlıatsııasyn qalpyna keltirý jónindegi sheteldik áriptestermen birlesken baǵdarlama aıasynda dalaǵa jiberilgen bolatyn.
