Torǵaı aımaǵynyń áleýmettik-ekonomıkalyq damýy Úkimettiń aıryqsha nazarynda bolýy kerek — Prezıdent

ASTANA. KAZINFORM — Torǵaı aımaǵynyń áleýmettik-ekonomıkalyq damýy Úkimettiń aıryqsha nazarynda bolýy kerek. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.

— Jurttyń vagondardyń jaı-kúıine kóńili tolmaıdy. Astanada vagon qurastyratyn zaýyt iske qosyldy. Bul osy saladaǵy ózekti máselelerdi sheshý úshin jasalǵan mańyzdy qadam boldy. Ozyq halyqaralyq standartqa saı jabdyqtalǵan zamanaýı jolaýshylar vagonyn jasaý shetel ınvestorynyń qatysýymen qolǵa alynady. Sońǵy jyldary avıatsııa ınfraqurylymyn jańǵyrtý úshin kóp jumys isteldi. Byltyr Almaty, Shymkent, Qyzylorda qalalarynda jańa termınaldar ashyldy, — dedi Prezıdent. 

Memleket basshysy jaqynda Zaısanda, Qatonqaraǵaı jáne Kendirlide áýejaı qurylysy aıaqtalatynyn aıtty.

— Arqalyq áýejaıy qalpyna keltirilip jatyr. Bul jobalar aımaqtardyń ekonomıkalyq belsendiligin arttyrýǵa yqpal etedi, jańa jumys oryndaryn ashýǵa múmkindik beredi, sondaı-aq, basqa da birqatar salanyń damýyna serpin beredi. Sondyqtan, bul jumys óz jalǵasyn tabady. Jalpy, Torǵaı aımaǵynyń áleýmettik-ekonomıkalyq damýy Úkimettiń aıryqsha nazarynda bolýy kerek, — dedi Qasym-Jomart Toqaev.

Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.

Kazinform saıty tikeleı efırmen qatar, jazbasha translıatsııa da jasaıdy.

Sondaı-aq Joldaý mátinin agenttiktiń telegram arnasynan oqýǵa bolady.