Tóreshilerge qatysty daý Ońtústik Koreıa men Japonııa fýtbolyn dúrliktirdi
ASTANA. KAZINFORM — Japonııa fýtbol qaýymdastyǵy (JFA) Ońtústik Koreıada jumys istegen kezinde tórt japonııalyq tóreshige «seksýaldyq qyzmetter» úshin aqy tólenýi múmkin degen aqparat taraǵannan keıin olarǵa qatysty tergeý bastady. Bul jaıly Kyodo agenttigi habarlady.
Jaǵdaıdan habardar derekkózdiń málimetinshe, JFA tergeý qorytyndysyn jarııalaýdy josparlap otyr.
Tekserýge 8 tamyzda Ońtústik Koreıanyń MBC telearnasynda kórsetilgen sıýjet sebep bolǵan. Telearna Ońtústik Koreıanyń Mádenıet, sport jáne týrızm mınıstrliginiń 2016 jylǵy aýdıt esebine silteme jasaǵan. Qujatqa sáıkes, Koreıa fýtbol qaýymdastyǵy (KFA) onǵa jýyq sheteldik tóreshige, onyń ishinde japonııalyq tóreshilerge de osyndaı qyzmetter kórsetýdi uıymdastyrǵan.
MBC málimetinshe, bul 2011-2012 jyldary Ońtústik Koreıada ótken jeti matchqa tórelik etken tóreshilerge qatysty. Olardyń qatarynda álem chempıonatynyń irikteý kezeńindegi kezdesýler de bolǵan. Tóreshilerge Seýl, Ýlsan jáne basqa qalalardaǵy massaj salondaryndaǵy qyzmetterdiń aqysy tólengen. Shyǵyndar KFA-nyń korporatıvtik nesıe kartalary arqyly rásimdelgen.
Osy jaǵdaıǵa qatysy bar tórt japonııalyq tóreshiniń biri áli de JFA-da jumys istep, qaýymdastyqtyń tóreshiler komıtetiniń quramynda otyr.
MBC málimetinshe, 2012 jylǵy álem chempıonatynyń Azııa irikteý kezeńiniń úshinshi týrynda Ońtústik Koreıa men Kýveıt arasyndaǵy matchqa tórelik etken tórt japonııalyq tóreshiniń ekeýi massaj qyzmetin alǵan. Ol kezdesýde Ońtústik Koreıa 2:0 esebimen jeńip, irikteýdiń fınaldyq kezeńine shyqty.
Esepte atalǵan jeti matchtyń úsheýi álem chempıonaty nemese Olımpıada oıyndarynyń irikteý kezdesýleri bolsa, qalǵan tórteýi joldastyq sıpatta bolǵan.
Eske salaıyq, buǵan deıin álemdegi eń qymbat fýtbolshy týraly jazǵanbyz.
