Tóreshilerdiń ádiletsiz sheshimin ózgertken Abylaıhan Júsipovtiń jekpe-jeginiń vıdeosy
ASTANA. QazAqparat - Germanııanyń Gambýrg qalasynda ótip jatqan bokstan álem chempıonatynda qazaqstandyq Abylaıhan Júsipov pen ıtalııalyq Vınchentso Mandjakapre arasyndaǵy jekpe-jektiń vıdeosy shyqty, dep habarlaıdy QazAqparat.
Eske salsaq, keshe 69 keli salmaq dárejesinde Abylaıhan Júsipov pen ıtalııalyq Vınchentso Mandjakapreniń jekpe-jegi ótken bolatyn. Onda úshinshi raýndta otandasymyzdyń jaraqat alýyna baılanysty tóreshi jekpe-jekti toqtatyp, ony ári qaraı jalǵastyrýǵa jol bermedi. Osylaısha jeńis ıtalııalyqtyń qanjyǵasyna baılandy. Keıinnen qazaqstandyq tarap tóreshiler sheshiminiń qaıta qaralýyna qol jetkizdi. Sebebi boksshylardyń aıqasy toqtatylǵan ýaqytta esep aıyrmasy boıynsha Júsipov alda kele jatqan edi. Sportshymyzǵa qosymsha medıtsınalyq tekserý qajet boldy. Tekserý nátıjesi Júsipovtiń alǵan jaraqaty bolmashy bolǵanyn jáne jekpe-jekti toqtatýdyń qajeti bolmaǵanyn kórsetti. Osylaısha, jeńis Júsipovke berildi.
Tómendegi vıdeodan jekpe-jek barysynda otandasymyzdyń asa bir aýyr jaraqat almaǵanyn baıqaýǵa bolady.
