Tóreshiler jeńisti Alvareske berip qoıýy ábden múmkin - Stangrıt
ASTANA. QazAqparat - Tanymyl reseılik kommentator ári boks mamany Grıgorıı Stangrıttiń oıynsha, Golovkın - Alvares jekpe-jegi 12 raýndqa sozylady. Sebebi eki boksshy da myqty. Alaıda Golovkınge jeńiske jetý úshin aıqyn basymdyq qajet, dep xabarlaıdy QazAqparat tilshisi.
"Búginde atalǵan jekpe-jektiń nokaýtpen aıaqtalatyny jaıynda jıi aıtylyp júr. Degenmen, nokaýt bolmaıdy dep oılaımyn. Ol jekpe-jek 12 raýndqa deıin sozylady. Eki boksshy úshin aýyr raýndtar bolady. Sebebi ekeýi de jaqsy soqqy jasaıdy, sol soqqyny jaqsy kótere alady da. Sondyqtan jekpe-jek tolyq 12 raýndpen aıaqtalady dep sanaımyn. Árıne, bireýdiń qabaǵy jarylsa, áńgime basqasha órbıdi. Alaıda taza nokaýt bolmaıdy. Sosyn bul jerde taǵy bir nárseni eskerý kerek, búginde Golovkınmen salystyrǵanda, Alvarestiń ataq-abyroıy joǵary, jankúıeri de kóp. Sondyqtan tóreshilerdiń qaı jaqqa ıiletini belgisiz. Menińshe, Golovkın men Alvarestiń upaı sany shamalas bolsa, tóreshiler jeńisti Alvareske berip qoıýy ábden múmkin. Sol sebepti Golovkınge óz qarsylasyn jaı jeńip qana qoımaı, aıqyn basymdyqqa ıe bolǵany jón", - deıdi Stangrıt.
Aıta keteıik, buǵan deıin AQSh-tyń sport sarapshylary da Gennadıı Golovkınge aıqyn basymdyqpen jeńý kerektigin jetkizgen. "Eger Golovkın Alvaresti nokaýtpen jeńse, onda ol bokstyń shyńyna kóteriledi. Bálkim, PPV (pound-for-pound) reıtıngisinde birinshi orynǵa shyǵar. Bul jekpe-jekte nokaýt Golovkınge úlken ataq-dańk ákeledi. Sebebi osy ýaqytqa deıin "sarybas" meksıkalyq juldyzdy áli eshkim nokaýtqa jibergen emes. Golovkın taza nokaýtpen jeńse, boks áleminde úlken ózgerister bolady. Budan bólek, Golden Boy úshin "Alvaresti revansha shyǵaraıyq pa, joq pa?" degen úlken dıllema týyndaıdy. Sebebi Saýl taǵy nokaýt alsa, onyń búkil sporttyq mansaby nokaýt alǵandaı bolady. Ol PPV juldyzy ataǵynan da aıyrylady", - dep jazdy Boxingnews24.com saıtynyń jýrnalısi Den Embroýz.
