Tóreshiler sheshimi qaıta qaraldy: Júsipov Álem chempıonatyn jalǵastyrady
ASTANA. QazAqparat - Germanııanyń Gambýrg qalasynda ótip jatqan bokstan Álem chempıonatynda qazaqstandyq Abylaıhan Júsipovpen aıqasqan ıtalııalyq Vınchentso Mandjakapreni jeńimpaz dep tanyǵan tóreshilerdiń sheshimi qaıta qaraldy, dep habarlaıdy QazAqparat.
Eske salsaq, búgin 69 keli salmaq dárejesinde Abylaıhan Júsipov pen ıtalııalyq Vınchentso Mandjakapreniń jekpe-jegi ótti. Úshinshi raýndta otandasymyzdyń jaraqat alýyna baılanysty tóreshi jekpe-jekti toqtatyp, ony ary qaraı jalǵastyrýǵa jol bermedi. Osylaısha jeńis ıtalııalyqtyń qanjyǵasyna baılandy.
Keıinnen qazaqstandyq tarap tóreshiler sheshiminiń qaıta qaralýyna qol jetkizdi. Sebebi boksshylardyń aıqasy toqtatylǵan ýaqytta esep aıyrmasy boıynsha Júsipov alda kele jatqan edi. Sportshymyzǵa qosymsha medıtsınalyq tekserý qajet boldy. Tekserý nátıjesi Júsipovtyń qabaǵyna alǵan jaraqaty bolmashy bolǵanyn jáne jekpe-jekti toqtatýdyń qajeti bolmaǵanyn kórsetti. Osylaısha, jeńis Júsipovke berildi.
Eske salsaq, buǵan deıin shırek fınalǵa 4 sportshymyz - Ábilhan Amanqul (75 kelige deıin), Jomart Erjan (49 keli), Qaırat Eralıev (56 keli) pen Vasılıı Levıt (91 kelige deıin) ótken bolatyn. 29 tamyzda Jomart reseılik Vasılıı Egorovpen, Qaırat nemis Omar El-Hagpen, Ábilhan kýbalyq Arlen Lopespen, Vasılıı avstralııalyq Djeıson Ýotelımen qolǵap túıistiredi.
Úsh sportshymyz - Azamat Isaqulov (52 keli) pen Ádilet Qurmetov (60 keli) pen Bekdáýlet Ibragımov (64 kelige deıin) týrnırdegi jarysyn aıaqtady.
25 tamyzda bastalǵan bokstan Álem chempıonaty toǵyz kúnge jalǵasyp, 2 qyrkúıek kúni márege jetedi.
