Tórelik ınstıtýtyn jetildirý jumystary júrgizilip jatyr — Úkimet basshysy

ASTANA. KAZINFORM — Tórelik palatasynyń ókilettikteri keńeıtilmek. Bul jaıynda Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.

— Búgingi tańda Qazaqstan Respýblıkasy Prezıdentiniń 2022 jylǵy 26 qarashadaǵy № 2 Jarlyǵymen bekitilgen Qazaqstan Respýblıkasy Prezıdentiniń «Ádiletti Qazaqstan: bárimiz jáne árqaısymyz úshin. Qazir jáne árdaıym» saılaýaldy baǵdarlamasyn iske asyrý jónindegi sharalar týraly is-qımyl josparynyń 16-tarmaǵyn oryndaý aıasynda Ádilet mınıstrligi tórelik talqylaýda azamattardyń quqyqtaryn qorǵaý turǵysynan tórelik ınstıtýtyn jetildirý boıynsha jumys júrgizýde. Atalǵan jumys aıasynda qoldanystaǵy zańnama, halyqaralyq qujattar, quqyq qoldaný praktıkasy, sondaı-aq azamattardyń ótinishteri zerdelendi, — dedi Úkimet basshysy.

Onyń atap ótýinshe, júrgizilgen jumys qorytyndysy boıynsha mynadaı usynystar ázirlendi:

— tóreshilerge qoıylatyn talaptardy kúsheıtý;

— turaqty jumys isteıtin tórelikterge qoıylatyn talaptardy kúsheıtý;

— Tórelik palatasynyń ókilettikterin keńeıtý;

— taraptardyń quqyqtaryn kúsheıtý.

— Atalǵan usynystar azamattardyń daýlaryn bilikti ári táýelsiz tóreshilerdiń qaraıtynyna beriletin kepildikterdi arttyrýǵa, «satylyp ketetin» tórelikterdiń qurylý yqtımaldyǵyn azaıtýǵa, azamattardyń quqyqtary buzylsa, ony tıimdi qorǵaý úshin qosymsha múmkindikter berýge, sondaı-aq daýlardy sheshýdiń balamaly tásili retinde azamattar arasynda tórelikti tanymal etýge baǵyttalǵan, — dedi Premer-mınıstr.

Sondaı-aq Úkimet basshysy depýtattyq saýalda usynylǵan bastamalar tórelik kelisimniń «álsiz» taraptaryn qorǵaýǵa jáne zańnamalyq talaptardy kúsheıtýge baǵyttalǵanyn atap ótedi.

— Osyǵan baılanysty tóreshilerge qosymsha biliktilik talaptaryn belgileý, kásibı jaýapkershilikti mindetti saqtandyrý, sottyń tóreshilerden bas tartý týraly ótinishterdi qaraýy, jeke tulǵalarmen jasalǵan qosylý týraly sharttardy (rıeltorlyq sharttar, servıstik qyzmet kórsetý sharttar) jaramsyz dep taný jaǵdaılaryn keńeıtý, taraptarǵa habarlamalar jiberý, sondaı-aq tórelikterdiń ataýyna qoıylatyn talaptardy belgileý jónindegi depýtattardyń usynystary tórelik týraly zańnamany jetildirý boıynsha júrgizilip jatqan jumystar aıasynda eskeriletin jáne qaralatyn bolady, — dedi Oljas Bektenov.

Buǵan deıin Qarashyǵanaq munaı kenishin ıgerýshiler men Qazaqstan arasyndaǵy ekinshi halyqaralyq tórelik is álemdik ınvestorlarǵa aıqyn belgi bolatynyn jazǵan edik.