Tórelik jáne aralyq sottyń quzyreti keńeıetin bolady - Májilis
ASTANA. 13 naýryz. QazAqparat - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine tórelik jáne aralyq sottyń qyzmetin jetildirý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady. Májilis maquldaǵan qujat endi Senatqa joldanady.
Atalǵan zań jobasynyń maqsaty tórelik jáne aralyq sottyń qyzmetin jetildirý bolyp tabylady. Bul rette, atalǵan sottardyń quzireti qoldanystaǵy zańda kórsetilgendeı, azamattyq-quqyqtyq sharttardan emes, azamattyq-quqyqtyq qatynastardan týyndaıtyn daýlardy qaraý quqyǵyn berý arqyly keńeıtiledi. Sonymen qatar zań jobasyna sáıkes, tórelik jáne aralyq sot adamnyń ómiri men densaýlyǵyna, jeke ómirine jáne otbasy qupııasyna qol suǵylmaýshylyqqa, atyna berilgen quqyqqa baılanysty múliktik emes sıpattardaǵy daýlardy qaraýǵa quqyly bolmaıdy. Budan bólek, halyqtyń aralyq sot jónindegi aqparatqa erkin qol jetkizýin qamtamasyz etý maqsatynda turaqty jumys isteıtin aralyq sot qyzmetiniń sharttary belgilenedi.
Ekinshi oqylymǵa ázirleý barysynda zań jobasyna birqatar usynystar engizilgen bolatyn. Atap aıtqanda, depýtattar aralyq sottyń, tóreliktiń sheshimine shaǵym jasaý týraly aryzdy sotqa berý tetigi jáne ony qaraý tártibin naqtylady. Sonymen qatar, zań jobasymen aralyq sottardy memlekettik organdar men memlekettik kásiporyndar janynan qurýǵa, sondaı-aq tabıǵı monopolııalar sýbektileriniń jáne naryqta ústemdik etetin sýbektiler janynan qurýǵa shekteýler de qarastyrylyp otyr.
