Tórelik jáne aralyq sottar quzyreti nyǵaıady - Parlament
ASTANA. 20 maýsym. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine tóreliktiń jáne aralyq sottyń qyzmetin jetildirý máseleleri boıynsha ózgerister men tolyqtyrýlar engizý týraly» zań jobasy boıynsha kelisim komıssııasynyń usynystaryn talqylady.
Nátıjesinde atalǵan zań qabyldandy, qujat Memleket basshysynyń qol qoıýyna joldanady.
Atalǵan qujat Elbasynyń Joldaýynda júktelgen tapsyrmalardy iske asyrý maqsatynda ázirlengen. Bul rette zań jobasy eń aldymen, tórelik jáne aralyq sottardyń qyzmetin nyǵaıtýǵa, onyń ishinde memlekettik sottardyń júktemesin azaıtýǵa baǵyttalady. Atap aıtqanda, zań jobasy arqyly tóreliktiń jáne aralyq sottyń quzyretine qoldanystaǵy zańnamada kózdelgendeı azamattyq-quqyqtyq sharttardan emes, azamattyq-quqyqtyq qatynastardan týyndaıtyn daýlardy qaraý quqyǵyn berý arqyly keńeıtý usynylady.
Májilis maquldaǵan qujatqa Senat birqatar túzetý usynǵan bolatyn. Onyń birazymen tómengi palata depýtattarynyń kelispeýinen qos palata arasynda kelisim komıssııasy qurylǵan edi. Talqylaý barysynda depýtattar komıssııa usynystaryn qoldap, qujatty qabyldady.
