Tórehan Sabyrhan – «Strandja» týrnıriniń eń úzdik boksshysy atandy

ASTANA. KAZINFORM - Bolgarııa astanasynda bir aptaǵa sozylǵan bokstan halyqaralyq «Strandja kýbogi» óz máresine jetti. Qazaqstandyq boksshy Tórehan Sabyrhan týrnırdiń chempıondyǵymen qosa, «Eń úzdik boksshysy» ataǵyna qol jetkizdi.

Osyǵan deıin habarlaǵanymyzdaı, Tórehan Sabyrhan 67 kelige deıingi salmaqta top jardy.

Otandasymyz «Strandja kýbogynyń» jerebesine sáıkes, alǵashqy aınalymynda ózbekstandyq Olımpıada chempıony Asahýdja Mýıdýnhodjaevpen judyryqtasýy kerek bolǵan. Alaıda, qarsylasy sharshy alańǵa shyǵýdan bas tartty.

Al shırek fınalda grýzın Lasha Gognıdzeni jarys jolynan taıdyrdy. Jartylaı fınalda ázerbaıjandyq Nabı Isgandarovtan aılasyn asyrdy. Fınalda taǵy bir ázerbaıjandyq boksshy Zaýr Gahramanovqa myqtylyǵyn moıyndatty.

Osylaısha Bolgarııada 1 aptaǵa jalǵasqan halyqaralyq týrnırdiń qorytyndysy boıynsha, 19 jastaǵy Tórehan Sabyrhan «Eń úzdik» dep tanylyp, arnaıy marapatqa ıe boldy. Buǵan deıin osy týrnırde birde-bir qazaqstandyq boksshy dál osyndaı ataqqa qol jetkizip kórmegen bolatyn.

Esterińizge sala keteıik, atalǵan týrnırde Qazaqstan quramasy jalpy esepte top jaryp, eń úzdik kórsetkishin tirkedi.