Tóregeldi Sharmanov: Dál qazirgi jaǵdaıda qymyz ben jylqy etine jeter esh taǵam joq
NUR-SULTAN. QazAqparat – Qazaq taǵamtaný akademııasynyń prezıdenti, medıtsına ǵylymdarynyń doktory Tóregeldi Sharmanov «Antikor Live» jobasyna kelip, óz oıymen bólisti. Onyń aıtýynsha qazirgi indet órshigen jaǵdaıda ár adam úıdegi jas úlken kisilerdiń jaıyn oılaýy kerek, dep habarlaıdy QazAqparat tilshisi.
«Bul indettiń basty qaýpi – úlken jastaǵy adamdardy alyp ketýi. Sondyqtan jastar eń aldymen qaýip-qaterden ózderin saqtap qana qoımaı, úlken kisilerdi oılaýy kerek. Jastar qazir óz úıine, otbasyna bir ujym dep qarap, aınalasyn qorǵaýy tıis», - deıdi Tóregeldi Sharmanov.
Qazaq taǵamtaný akademııasynyń prezıdenti dál qazirgi ýaqytta adam densaýlyǵyna qandaı taǵamdar paıdaly ekenin aıtyp berdi.
«Qazir qoıý nemese qýyrylǵan tamaqty jeýdiń ornyna suıyq tamaqty kóp ishý kerek. Sý bolsyn, qymyz bolsyn, sorpa-sý bolsyn suıyq ishý kerek. Qymyz ben aırannyń paıdasy zor. Osy kúni jylqynyń qazaq úshin qadiri artty. Sebebi adamnyń aǵzasyna jylqy eti óte jaqsy áser etedi. Árıne dál qazirgi kúni qymyz ben jylqy etine jeter esh taǵam joq. Biraq oǵan jurttyń báriniń qoly jete bermeýi múmkin. Qazaq jalpy «qoıdyń eti qorǵasyn» dep tekke aıtpaıdy. Keshki asqa qoıdyń etin jeseńiz, ol erteńgi kún batqansha sińedi. Uzaq. «Sıyrdyń eti tań saraıy batqansha, jylqynyń tósek salyp jatqansha» deıdi qazaq. ıAǵnı jylqy eti boıǵa tez sińedi. Sondyqtan jylqy etiniń qasıeti erekshe ekenin kórsetedi. Ol ǵylymı jolmen dáleldengen. Men onymen kóp aınalystym. Ony jaı derekten alyp otyrǵan joqpyn. Ózim zerttep, kózim jetken. Tolyqqandy jaýapkershilikpen aıta alamyn», - dedi ol.
Tóregeldi Sharmanovtyń sózinshe bul aýrýǵa birinshi tótep beretin faktor – taǵam.
«Seniń ómir súrýińniń sapasy – ishken asyńmen ólshenedi. Biz ádette balalardyń amandyǵyn, toqtyǵyn birinshi orynǵa qoıamyz. Al qazirgi jaǵdaıda úıdegi kárilerdiń qamyn birinshi oılaý kerek. Sebebi balalardyń boıynda aýrýǵa tótep berer ımmýnıtet joǵary. Al úlken kisilerdi bul indetten saqtaý kerek. Moraldyq turǵyda alǵanda da úlken kisilerdiń amandyǵyn birinshi oılaý kerek», - dedi ol.
