Tóregeldi Sharmanov Aqtóbege bıe sútinen jasalǵan shokolad ákeldi
AQTÓBE. QazAqparat - Aqtóbege Ulttyq taǵamtaný akademııasynyń prezıdenti Tóregeldi Sharmanov keldi. Ol oblys ákimi Berdibek Saparbaevqa qant dıabeti, qaterli isiktiń aldyn alýǵa kómektesetin, bıe sútinen jasalǵan shokoladty syıǵa berdi, dep habarlaıdy QazAqparat tilshisi.
Ulttyq taǵamtaný akademııasynyń prezıdenti Tóregeldi Sharmanov osydan 50 jyl buryn Aqtóbedegi medıtsınalyq ýnıversıtette rektor qyzmetin atqardy. Eńbek jolyndaǵy 20 jyldan astam ýaqyt ony aqtóbelikter qataryna qosty. Ózi de Aqtóbeni erekshe qurmetteıdi. Búgin ol «Týǵan jerim - tiregim!» aktsııasyna qatysyp, oblys ákimi Berdibek Saparbaevqa qant dıabeti men qaterli isik aýrýynyń aldyn alýǵa kómektesetin shokoladty syıǵa berdi. Bul qazaq ǵalymynyń álemdi moıyndatqan úlken ǵylymı jobasy.
«Patent óte kóp. Kóbi sórede jatady. Birde Prezıdent ǵalymdarmen kezdesýinde «Patent jaqsy, nátıje qaıda?» dep surady. Ol kezdesý kezinde meniń usynysymmen qymyz iship, qazy jep júrgenin aıtty. Sodan soń menen «Siz ne istedińiz?» dep surady. Men 85 jasymda basqa arnaǵa burylyp, zertteýimniń nátıjesin shyǵardym. Bıe sútinen ıogýrt, balmuzdaq jasaldy. Biraq jańa jańalyq bárinen myqty. Shokolad jasaldy. Quramynda qanty joq. Bir qıyny, bıe sútin qaınatýǵa, tazartýǵa bolmaıdy. Onyń qunary shıki sútte taza saqtalady. Sol bıe sútinde bar qundy zatty esh jerden ala almaımyz. Eńbektenip, jańa tásildi paıdalanyp, shokolad jasaldy. Ol qant dıabeti, qaterli isiktiń aldyn alady»,- degen Tóregeldi Sharmanov jańa ónimniń birneshe danasyn oblys ákimi Berdibek Saparbaevqa syıǵa berdi.
«Zertteý nátıjesine qol jetkizip, ónim alý úshin Shveıtsarııaǵa barýǵa týraly keldi. Bul jańalyq elimizdiń maqtanyshy bolady»,- dedi Sharmanov.
Aqtóbeliktermen kezdesý kezinde akademık Sharmanov aldaǵy 10-15 jylda álemdik statıstıkanyń kúrt ózgeretinin aıtty.
«Qyzyq statıstıka, Aqtóbede 100 jastan asqan adamdar sany 20-ǵa jetti. Al 90 men 100 jas arasyndaǵy qarııalar sany 1300 eken. Bul tabıǵı, laıyqty ózgeris. Qazir demografııalyq transformatsııa dep atalatyn úrdis bar. Máselen, qazir dúnıejúzi boıynsha 5 jasqa tolǵan balalar sany halyq sanynyń 10 paıyzyn, al 80-nen asqandar sany halyqtyń 1 paıyzyn quraıdy. Endi 10-15 jyldan soń kúrt ózgeris bolady. 5 jasqa deıingi balalar sany 5 paıyzǵa deıin tómendeıdi de, 80 jastan asqan adamdarymyz 15 paıyzǵa artady. Bul ózgeris kóp nárseni ańǵartady»,- dedi ǵalym.
