Tóreǵalıdiń tártibi: Almaty áýejaıy shekarashynyń aıtqanyn joqqa shyǵardy
ALMATY. QazAqparat - Almaty halyqaralyq áýejaıy shekarashynyń aıtqan málimdemesin joqqa shyǵardy, dep habarlaıdy QazAqparat tilshisi.
2010 áskerı bóliminiń qyzmetshisi «Vremıa» basylymyna qyrkúıektiń 14-i kúni «Eır-Astana» Almaty-Gonkong reısinde bolǵan oqıǵaǵa qatysty óz pikirin bildirgen.
Ol VIP-agent bıletsiz er adamnyń otbasyn shyǵaryp salýyna ruqsat berý týraly ótinish aıtqanyn málimdegen edi.
«Bul aqparat shyndyqqa janaspaıdy. Іshki tekserý nátıjesinde áýe qaýipsizdigi qyzmetiniń, qaraý bóliminiń qyzmetkerleri, VIP qyzmet agentteri er adamdy bıletsiz ótkizý týraly ótinish aıtpaǵan. Buǵan VIP-termınal dálizindegi kameralar dálel bola alady. Beınematerıaldar qyzmettik tekserý kezinde tolyq zertteldi», - dedi baspasóz qyzmetinen.
Áýejaı ókilderi jaýapkershilikten qashpaıtyndaryn aıtty.
«Qaraý bóliminiń qyzmetkerleri ózderiniń baqylaý pýnktinde otyrý talonyn kórsetýin talap etpeı, ótkizip jibergen. Bul úshin qaraý bóliminiń ınspektorlary Raqymgereev Rınat pen Qyrǵyzbaev Abylaı, Zakırova Sholpan árqaısysy 20 AEK kóleminde aıyppul tóleıtin boldy», - dedi áýejaıdan.
Áýejaı taratqan aqparatqa sáıkes, jolaýshylardy tirkeý men bagaj tekserý, boarding-kontrol, bortqa otyrǵyzý - áýe kompanııalarynyń qyzmetkerleriniń mindeti.
Al ushaqqa otyrǵyzý aldyndaǵy pasport tekserý, ushaqqa otyrǵyzý aldyndaǵy tekserýdi QR UQK shekara qyzmeti oryndaıdy.
Jolaýshylardy jeke tekserý, qol júgi men júkti tekserý Almaty áýejaıy qyzmetkerleriniń mindeti bolyp tabylady eken.
