Tóreǵalıdiń daýly kontsertinde bolǵan aqsaqal ánshini keshirýge shaqyrdy
ASTANA. QazAqparat - Tóreǵalıdiń arty daýǵa ulasqan kontsertinde bolǵan pavlodarlyq aqsaqal ánshini keshirýge shaqyrdy, dep habarlaıdy QazAqparat Pavlodarnews.kz agenttigine silteme jasap.
Agenttiktiń redaktsııasyna 70 jastaǵy Pavlodar turǵyny Ásetolla Medeýov kelip, Tóreǵalıdiń kontsertinde bolǵan jaǵdaı týraly aıtyp bergen. Ol Jańa jyl qarsańynda qazaqstandyqtarǵa ánshini keshirýge shaqyrdy. Ásetolla Medeýovtyń aıtýynsha, 21-jeltoqsan kúni báıbishesi ekeýiniń otasqanyna 49 jyl tolǵan. Osyǵan oraı, aqsaqal kontsertke barǵan.
«Balkonda otyryp daýys kótergen qyzylordalyq kórermenniń qylyǵy durys bolmady. Al, jas ánshiniń sahanada aıtqany ashý ústinde boldy. Ol albyrt júrekti jigit. Endi qanattanyp kele jatqan talant. Elimdi kórkeıtemin dep júrgen azamatty basyp tastaý qatelik dep esepteımin. Keshirimdi bolý kerek. Bas kespek bolsa da, til kespek joq. Úlken qarııalar oǵan osy kúnge deıin talaı batasyn berdi. «Órkeniń óssin» dep tilegin aıtty», - deıdi qarııa.
Sondaı-aq, aqsaqal Pavlodar oblysy bıliginiń Tóreǵalı Tóreálini resmı is-sharalarǵa qatystyrmaý jónindegi sheshimi asyǵys jasaldy degen pikir bildirdi.
«Meniń anam jol apatyna ushyrap, 12 adamnyń arasynda jalǵyz kóz jumdy. Júrgizýshi bolǵan jıen aǵamdy sottaýǵa bolatyn edi. Biraq, qazaqta «Keshirimdi bolý», «Kúnshil bolma» degen sózi bar. Onyń qasynda Tóreǵalıdi keshirýge bolady ǵoı. Ashýmen aıtylǵany belgili. Sol kontsertte múgedek bala fotoǵa túsýge keldi. Tóreǵalı sýretke tústi, ol jamandyq oılaǵany ma? Qolyndaǵy sábıi bar bala da sýretke túsýge keldi. Ánshi bas tartpady. Qoltańbasyn da berdi, jamandyq oılaǵany ma? Adamnyń júregi ashyq bolý kerek. Al, balkondaǵy kórermenniń aıǵaı kóterýi orynsyz boldy», -dedi Ásetolla qarııa.
Onyń oıynsha, ánshi Pavlodarda kontsert ótkizip, halyqtan keshirim suraýy kerek. «21-i kúni bolǵan kórermenderin qaıta shaqyryp, artyq aıtqandary úshin keshirim surasa bolady», - deıdi Ásetolla Medeýov. Ol oqıǵaǵa qatysty jazǵan hatyn ala kelgen.
Eske salaıyq, 21-jeltoqsan kúni Tóreǵalı Tóreáli Pavlodar qalasynda Estaı atyndaǵy mádenıet saraıynda «Aıhaı-25» atty án keshin ótkizgen bolatyn. Kontsert kezinde kórermenderdiń biri ózin Qyzylordadan kelgenin aıtyp, ánshiden sýretke túse bermeı, án aıtýy kerektigin talap etken. Sahnada turyp qaıtarǵan ánshiniń jaýaby keıin jurtshylyqtyń narazylyǵyn týdyrdy. Kelesi kúni Tóreǵalı Instagramda tikeleı efırge shyǵyp kópshilikten keshirim surady.
