Tóreǵalı Tóreálige qatysty qylmystyq is qozǵaldy
«A. esimdi azamat, Almaty qalasy PD-niń ákimshilik qamaýǵa alynǵandarǵa arnalǵan ustaý ızolıatorynda otyr. Sonymen qatar, A. esimdi azamatqa qatysty QR QK-niń 378-babynda kózdelgen qylmystyq quqyq buzýshylyq belgileri boıynsha da qylmystyq is tirkeldi»,- dep atap ótti polıtsııadan.
Atalǵan qylmystyq is boıynsha óndiristi Almaty qalasy polıtsııa departamentiniń anyqtaý basqarmasy júrgizip jatyr.
Eske salsaq, 14 maýsym kúni Almatyda esirtkige masaıǵan kólik júrgizýshi polıtseılerge boı bermeı, oqıǵaǵa ornynan qashpaq bolǵany habarlanǵan edi. Patrýldik polıtsııa qyzmetkerleri júrgizýshini ustady jáne medıtsınalyq saraptama nátıjesinde onyń esirtkige mas ekendigi belgili boldy.
Sol kúni esirtkige masaıǵan kólik júrgizýshi ákimshilik jaýapqa tartyldy. Ol 20 táýlikke qamaýǵa alynyp, 7 jylǵa kólik júrgizý quqyǵynan aıryldy.
Sot otyrysynda quqyq buzýshy is materıaldarynda baıandalǵan faktilerdi rastap, ókinetinin aıtqan.
Aıta ketsek, pablıkter resmı aqparatta «A. esimdi azamat» dep berilgen kólik júrgizýshiniń Tóreǵalı Tóráli (Alıhanov – red.) ekenin jappaı jazdy.
Keıin Tóreǵalı Tóráliniń qaryndasy áleýmettik jelide aǵasy týraly aqparattyń jalǵan ekenin jazdy.
