Tóreǵalı Tóreáli men pavlodarlyq kórermenniń arasyndaǵy daý neden týyndady

 Bul týraly agenttikke Estaı atyndaǵy mádenıet saraıy dırektorynyń orynbasary Zamıra Soltan aıtty.

 Aıta keteıik, áleýmettik jelide ánshiniń kórermenderge kontsert unamasa, oryndarynan turyp shyǵyp ketýine bolatyny týraly aıtqan pikiri tarap ketken.

«21 jeltoqsan kúni Tóreǵalı Tóreáliniń «Aıhaı 25» atty kontserti ótken bolatyn», - deıdi Zamıra Soltan. - Buǵan deıin ol Batys Qazaqstan óńirinde óner kórsetip kelgen jáne syrqattanyp turǵany týraly aıtqan. Tipti, dárihanaǵa dárige jibergenin kórip te qaldyq. Densaýlyǵynyń sondaı jaǵdaıyna qaramastan, halyqtyń ózi úshin kelgenin aıtyp, án salýdan bas tartqan joq. Kontsert kezinde jurtshylyqtyń suraýymen tómen qaraı túsip, sýretke túsken bolatyn. Sol sátte kórermenderdiń biri «Biz seniń ánińdi tyńdaýǵa keldik. Nesine sýretke túse beresiń?  Sen meni uıatqa qaldyrdyń» dep aıtqan. Shamasy osy sózder ánshiniń namysyna tıip ketken bolý kerek».

 Zamıra Soltannyń aıtýynsha, bul jaǵdaı keshtiń ekinshi bóliminde oryn alǵan jáne budan keıin óner ıesi kontsertin ári qaraı jalǵastyrǵan. Osymen elimizdiń estrada juldyzy bıylǵy jyly Ertis óńirine ekinshi ret gastroldik saparmen kelgen. - Bizdiń basty mindetimiz - ánshiniń óner kórsetýi úshin tehnıkalyq jaǵyn qamtamasyz etý jáne zaldy jalǵa usyný. Sol jerde kúzet qyzmeti bolady. Degenmen olar árbir kórermendi baqylaı almaıdy. «Daıyndyq bólmesinde spırttik ishimdikter boldy ma?» degen suraqtar qoıyp jatyr. Degenmen ol jerde tek qana shaı men tabıǵı shyryndar bolady. Sebebi, onda laýazymdy tulǵalar kirip shyǵady. Alkogol kirgizýge qatań tyıym salynady. Sol kúni 850 orynǵa arnalǵan kórermen zalyna 600-den astam adam jınaldy, - deıdi mádenıet salasynyń qyzmetkeri. Aqbota Seısenbaeva.