Tóreǵalı Tóráliniń qaryndasy aǵasy týraly aqparattyń jalǵan ekenin aıtty

ASTANA. QazAqparat – Belgili ánshi Tóreǵalı Tóráliniń qaryndasy Dına Tóráli keshe Almatyda bolǵan oqıǵaǵa qatysty pikir bildirdi, dep habarlaıdy QazAqparat tilshisi.

Jaǵdaı bylaı. Kúni keshe jeńeshem ekeýi áýejaıǵa, Qyzylordada kútip otyrǵan bala-shaǵasyna asyǵyp bara jatqan. Rólde saý otyrǵan adamdy «mas kúıinde ustaldy» dep jalǵan aqparat taratýǵa eshkimniń quqyǵy joq. Halyqtyń kóńilin Qazaqstanda bolyp jatqan jaǵdaıdan basqa jaqqa aýdarý úshin jasalatyn ádeıi nárselerden, jala jabýlardan sharshadyq

, - dep jazdy Dına Tóráli Instagram jelisinde.

Sonymen birge, ol polıtsııa qyzmetkerleriniń basynda baıyppen sóılegen aǵasyn túsine almaǵanyna qapaly.

Internetke taratqanda nege búkil vıdeonyń basy joq? Nege tek ýshyqqan jeri ǵana? Myqty stsenarıı, jaraısyńdar

, - deıdi D. Tóráli.

Jazba avtory aǵasy týraly aqıqatty aldaǵy ýaqytta aqtara túsetinin málimdedi.

Osy ýaqytqa deıin búkil Qazaqstanǵa shýlaǵan aǵama qatysty jaǵdaılardyń artyndaǵy naǵyz shyndyqty bizden basqa eshkim bilmeıdi. Shyndyqtyń betin ǵana emes, túbimen qoparyp turyp sizderge aıtaıyn desem, ekinshi jaǵy da bar. Shyndyq eshqashan eshkimge jaqpaıdy ǵoı, ásirese bizdikilerge. Qalǵanyn aǵam bostandyqqa shyqqanda jalǵastyramyn

, - dep jazdy ánshiniń qaryndasy.

Eske salsaq, Almatyda esirtkige masaıǵan kólik júrgizýshi polıtseılerge boı bermeı, oqıǵaǵa ornynan qashpaq bolǵany habarlanǵan edi. Patrýldik polıtsııa qyzmetkerleri júrgizýshiniń ustady jáne medıtsınalyq saraptama nátıjesinde onyń esirtkige mas ekendigi belgili boldy.

Almaty qalalyq sotynyń málimetinshe, esirtkige masaıǵan kólik júrgizýshi ákimshilik jaýapqa tartyldy. Ol 20 táýlikke qamaýǵa alynyp, 7 jylǵa kólik júrgizý quqyǵynan aıryldy. Sot otyrysynda quqyq buzýshy is materıaldarynda baıandalǵan faktilerdi rastap, ókinetinin aıtqan.

Aıta ketsek, pablıkter resmı aqparatta «A. esimdi azamat» dep berilgen kólik júrgizýshiniń Tóreǵalı Tóráli (Alıhanov – red.) ekenin jappaı jazdy.