Tóreǵalı Tóráliniń qamaýdaǵy merzimi taǵy 15 kúnge sozyldy
Almaty qalalyq sotynyń baspasóz qyzmetinen málim etkendeı, A. esimdi azamat (Tóreǵalı Tóráliniń tegi boıynsha – avt.) 14 maýsym kúni Almaty kóshelerinde kólik júrgizip kele jatyp, tutas qos jolaqty jol belgisi bar jerde burylǵan jáne polıtsııa qyzmetkerleriniń zańdy talaptaryn oryndamaǵan.
Osyǵan baılanysty ol QR Ákimshilik quqyq buzý týraly kodekstiń 596-baby 3-bóligi (jol belgileriniń tutas syzyǵynan burylý) jáne 667-baby 1-bóligi (polıtsııa qyzmetkeriniń talaptaryn oryndamaǵany úshin) boıynsha qosymsha jaýapkershilikke tartyldy. 15 (on bes) táýlikke ákimshilik qamaýǵa alynyp, 6 (alty) aı merzimge kólik quralyn basqarý quqyǵynan aıryldy.
Sot sheshimi zańdy kúshine engen joq.
Eske sala keteıik, 14 maýsym kúni Almatyda esirtkige masaıǵan kólik júrgizýshi polıtseılerge boı bermeı, oqıǵaǵa ornynan qashpaq bolǵany habarlanǵan edi. Patrýldik polıtsııa qyzmetkerleri júrgizýshini ustap, medıtsınalyq saraptama nátıjesinde onyń esirtkige mas ekeni rastaldy. Sol kúni kólik júrgizýshi ákimshilik jaýapqa tartyldy. Ol 20 táýlikke qamaýǵa alynyp, 7 jylǵa kólik júrgizý quqyǵynan aıryldy. Sot otyrysynda quqyq buzýshy is materıaldarynda baıandalǵan faktilerdi rastap, ókinetinin aıtqan.
Pablıkter resmı aqparatta «A. esimdi azamat» dep berilgen kólik júrgizýshiniń Tóreǵalı Tóráli (Alıhanov – red.) ekenin jappaı jazdy. Al, Tóreǵalı Tóráliniń qaryndasy áleýmettik jelide aǵasy týraly taraǵan aqparattyń jalǵan ekenin jazdy.
Keıin Tóreǵalı Tóráliniń ızolıatordaǵy 20 kúndik jazasyna taǵy úsh kún qosyldy.
Búgin áleýmettik jelide ánshiniń rýlde otyrǵany týraly aqparat taraǵan bolatyn.
