Tóreǵalı Tóráli kólik rýlinde otyr – feık
Áleýmettik jelide kólik aıdaý quqyǵynan 7 jylǵa aırylǵan Tóreǵalı Tóráliniń mashına júrgizip bara jatqany týraly aqparat tarady. Almaty qalalyq Polıtsııa departamenti bul aqparattyń shyndyqqa janaspaıtynyn málimdedi.
«Ánshi ákimshilik jazasyn ótep jatyr, onyń kólik júrgizip júrgeni týraly aqparat jalǵan», - dep habarlady vedomstvodan.
Eske sala keteıik, 14 maýsym kúni Almatyda esirtkige masaıǵan kólik júrgizýshi polıtseılerge boı bermeı, oqıǵaǵa ornynan qashpaq bolǵany habarlanǵan edi. Patrýldik polıtsııa qyzmetkerleri júrgizýshini ustap, medıtsınalyq saraptama nátıjesinde onyń esirtkige mas ekeni rastaldy. Sol kúni kólik júrgizýshi ákimshilik jaýapqa tartyldy. Ol 20 táýlikke qamaýǵa alynyp, 7 jylǵa kólik júrgizý quqyǵynan aıryldy. Sot otyrysynda quqyq buzýshy is materıaldarynda baıandalǵan faktilerdi rastap, ókinetinin aıtqan.
Pablıkter resmı aqparatta «A. esimdi azamat» dep berilgen kólik júrgizýshiniń Tóreǵalı Tóráli (Alıhanov – red.) ekenin jappaı jazdy. Al, Tóreǵalı Tóráliniń qaryndasy áleýmettik jelide aǵasy týraly taraǵan aqparattyń jalǵan ekenin jazdy.
Keıin Tóreǵalı Tóráliniń ızolıatordaǵy 20 kúndik jazasyna taǵy úsh kún qosyldy.
