«Tóre túlik tórge ozsyn desek...»- respýblıkalyq basylymdarǵa sholý
ASTANA. Qańtardyń 6-sy. /QazAqparat/ - Qazaq aqparat agenttigi respýblıkalyq basylymdarda qańtardyń 6-sy, sársenbi kúni shyqqan ózekti materıaldarǵa sholýdy usynady.
«Eýropada merekelik demalystar jalǵasýda. Avstrııa astanasy turǵyndary birazǵa sozylǵan Jańa jyl jáne birqatar dinı meıramdarǵa oraı úzilisten shyǵýǵa asyǵar emes. Eýropadaǵy qaýipsizdik jáne yntymaqtastyq jónindegi uıymnyń májilister qyzmeti de resmı túrde demalysta bolǵanmen, Uıym Hatshylyǵy óz jumysyn birtindep jandandyrýda. Osyndaı mereke kúnderi arasynda qazaq dıplomatııasy EQYU-ǵa tóraǵalyǵyna baısaldy kirisip ketti», - dep jazdy «Egemen Qazaqstan» gazeti. Tolyǵyraq basylymnyń búgingi sanyndaǵy «Qazaqstan tóraǵalyǵynyń alǵashqy májilisi» degen taqyryptaǵy maqaladan oqı alasyzdar.
«Tóre túlik tórge ozsyn desek...». Osy taqyryppen berilgen atalmysh basylymdaǵy kelesi maqala qazaq úshin jylqynyń orny bólek ekendigin, jylqy sharýashylyǵyn damytý kerektigin jazypty. «Qazaq pen jylqy egiz uǵym dese de bolǵandaı. Qanshama ǵylym men tehnıka jetistikterin ıgerdik, órkenıetke jettik degenmen tóre túlik bizdiń ulttyq brendimiz bolýy kerek-aq. Jylqy ósirý tek qazaqtyǵymyzdy kórsetý úshin emes, naryqtyq jaǵdaıda paıdanyń da kózi bolǵaly turǵanyn eskeretin kez keldi»,- deıdi basylym.
«Bilim bolmaı jaqsy jazýshy, jaqsy aqyn shyǵatyny beker. Muqaǵalıdan estigen áńgimem eske túsedi, soǵystyń ash-qursaq jyldarynda bıeni emetinbiz deıdi. Sumdyq sýret qoı! Sol aıtqandaı, bilimge shóldegen bizder de kitaphanany kádimgideı «saýdyq». Kitapty toqylǵan torqaltamen toltyryp ákelip, oqyp bolǵan soń qaıta aparyp tapsyramyz. Sóıtip júrip oqydyq»,- deıdi Qazaqstannyń halyq jazýshysy Qadyr Myrza Áli «Egemen Qazaqstan» gazetine bergen suhbatynda. Zamananyń zańǵar aqynymen oı bóliskińiz kelse, basylymnyń búgingi sanyndaǵy «Qubylys» taqyrybymen berilgen suhbatqa nazar aýdaryńyz.
***
«On toǵyzynshy maýsymǵa daıarlyq qalaı?». Osy taqyryppen berilgen «Jas Alash» gazetindegi kelesi maqala endi úsh aıdan keıin fýtboldan Qazaqstan premer-lıgasynyń on toǵyzynshy maýsymy jalaýyn kóteretindigin jazypty. «El birinshiligine qatysatyn elimizdiń on eki úzdigi alaman báıgege qatysýǵa daıyndyqtaryn bastap ta ketti. Jańa jylǵa deıin demalys alǵan komandalar endi aqpan aıynyń sońyna deıin oqý-jattyǵý jıyndaryn pysyqtaıdy. Jyl qusy sııaqty jyly jaqqa sapar shegetin komandalar qazirdiń ózinde Qara teńizdiń jaǵalaýyna "ushýǵa" daıar otyr»,- deıdi basylym.
***
AQSh-tyń Qazaqstandaǵy burynǵy elshisi Djon Ordveı «Evropa 2001» jýrnalynda jarııalaǵan maqalasynda elimizde istegen jyldary, dıplomatııalyq korpýstyń Astanaǵa kóshýi týrasynda jazyp, Qazaqstannyń tabıǵatynan alǵan áserlerin aıtypty. Elshi maqalasynyń oryssha nusqasymen tolyq tanysqyńyz kelse, «Kazahstanskaıa pravda» gazetiniń búgingi sanyn qarańyz.
Qazaqstan EQYU tóraǵalyǵyna kirisip ketti. Osyǵan baılanysty www.osce2010.kz resmı saıty da iske qosyldy. Onyń negizgi mindeti - aǵymdaǵy jylǵy Tóraǵalyq qyzmetin aqparattyq qamtamasyz etý. Osy jóninde habarlaǵan «Kazahstanskaıa pravda» gazetiniń jazýyna qaraǵanda, saıtta medıa-kitaphana, beıne jáne aýdıo faıldardy júkteý termınaly, sondaı-aq QR Syrtqy ister mınıstri - Memlekettik hatshysynyń «EQYU úshtigi» quramyndaǵy jáne Tóraǵa retindegi qyzmeti týraly aqparattar ornalastyrylǵan.
