«Topjarǵan» án baıqaýynyń jeńimpazy anyqtaldy

Úsh aıǵa sozylǵan mega shoýdyń fınalyna Aqmaral Mamaı, Raıymbek Satybaldy, Dosjan Úbıev jáne Ámre shyqqan bolatyn.
 

Mýzykalyq baıqaýdyń erejesi boıynsha apta saıyn tórt qatysýshy óner kórsetip, olardy jańadan kelgen ánshiler jekpe-jekke shaqyryp otyrdy. Myqty degen tórteýi fınalǵa jetip, olar ózara baq synasty.

Aıta keteıik, fınalǵa deıin Ámre men Dosjan jobadan shyǵyp, qaıta oralǵan bolatyn, al Raıymbek pen Aqmaral aqtyq synǵa deıin óz oryndaryn eshkimge bergen oryndaýshylar.

«Ózge qatysýshylarǵa qaraǵanda Raıymbek te, Aqmaral da erekshe. Olardyń mýzykalyq talǵamy, vokaldyq daıyndyǵy óte joǵary, sondyqtan tórt qatysýshynyń ishinen osy eki ánshige basymdyq berdik», - deıdi Roza Rymbaeva.
 

Fınal «Habar» telearnasynda tikeleı efırde kórsetildi, kórermender ózderine unaǵan qatysýshyǵa daýys berdi. Sahnada birinshi bolyp kórermenniń kózaıymyna aınalǵan Raıymbek Satybaldy «I got it» ánin oryndady. Keıin «Qap, qaıteıin» ánimen Aqmaral shyqsa, Dosjan Úbıev «Pesnıa o lıýbvı» ánin oryndady. Sońǵy bolyp «Baqyt qushaǵynda» ánimen Ámre óner kórsetti.

Jobanyń erejesi boıynsha ınternette kóp daýys jınaǵan qatysýshy fınalda óziniń qarsylasyn tańdaýǵa múmkindik aldy, al qalǵan eki qatysýshy ózara saıysady. Nátıjesinde kórermenniń daýys berýimen Aqmaral Mamaı jeńimpaz atanyp, ol Raıymbek Satybaldyny jekpe-jekke shaqyrdy. Raıymbek «Unchained melody» ánin, al Aqmaral «I will survive» ánin oryndap, Aqmaral sýperfınalǵa ótti. 

Ámre men Dosjannyń jekpe-jeginde Ámre jeńimpaz atandy. Degenmen Roza Rymbaeva «Dosjan eń úzdik oryndaýshylardyń biri jáne solaı qala beretindigin» aıtty. Sonymen qatar «Slavıanskıı bazar» halyqaralyq baıqaýyna baryp qaıtýy úshin demeýshi bolýǵa daıyn ekenin de jetkizdi.

Sýperfınalda Aqmaral «If I ant got you» ánin, al Ámre «Qustar ánin» shyrqap shyqty. Oryndaýshylardyń barlyǵy joǵary deńgeıde óner kórsetti.

«Osy zalda otyrǵandardyń kópshiligi Ámreniń esimin aıtyp jatty, bul árıne túsinikti. Sebebi Ámre bul baıqaýǵa deıin kóptegen jobalarǵa qatysyp, kórermenniń júreginen oryn aldy. Ol shyn máninde joǵary deńgeıdegi oryndaýshy. Onyń oryndaýshylyq sheberligi, ózin sahnada ustaýy erekshe, ony estrada juldyzdarynyń arasynan oryn alyp úlgergen ánshi dep bilem. Degenmen biz halyqaralyq deńgeıde elimizdi jas ánshi tanytýy kerek dep oılaımyz. Sondyqtan Aqmaral Mamaıdy tańdadyq» - dedi Roza Rymbaeva.
 

 «Qatysýshylarǵa úlken rahmet aıtqym keledi, sebebi olar alǵa qaraı qadam basty. Bul tek sizder úshin emes,  aýyldarda sizderdi qarap, sahnada óner kórsetýdi armandaıtyn jastar úshin de úlken qadam. Bizdi kórip otyrǵan jastar 2019 jyly «Topjarǵan» jobasyna qatysyp, osy sahnada óner kórsetedi degen senimdemin», - dedi «Habar» agenttigi basqarma tóraǵasy Alan Ájibaev.

Aqmaral barlyq jankúıerlerine alǵys bildirip, sońynda ózine jeńis syılaǵan ándi oryndady. Sonymen «Topjarǵan» jobasy máresine jetti.