Topyraqtyń qunarlylyǵy joıylyp barady
ASTANA. 14 aqpan. QazAqparat /Qanat Mámetqazyuly/ - Topyraqtyń qunarlylyǵy joıylyp barady. Búgin QR Parlamenti Májilisinde ótken Úkimet saǵatynda Jer resýrstaryn basqarý agenttiginiń tóraǵasy Ómirzaq Ózbekov osylaı málim etti.
«Topyraq qunarlyǵy salasynda nazar aýdaratyn másele jetkilikti. Máselen, 2000-2010 jyldary 17,7 mln. gektar egistik jerlerge júrgizilgen agrohımııalyq zertteýlerdiń nátıjesi boıynsha respýblıkanyń sýarylmaıtyn egistik jerlerdegi qarashirigi tómen aýmaqtar 60 paıyzdy, sýarmaly egistik boıynsha 98 paıyzdy qurap otyr. 1990 jyly 1 gektar egistikke engiziletin tyńaıtqyshtar 19 kelini qurasa, bul kórsetkish 2000 jyly 0,7 keli al 2010 jylǵa qaraı 4,4 kelini qurap otyr. Osy jumystar úshin aýyl sharýashylyǵy óndirisinde tyńaıtqyshtardy qoldanýdy júıeli jolǵa qoıý topyraq qunarlyǵyn arttyrýdyń basty sharttary bolyp tabylady. Bul jumysty Aýyl sharýashylyǵy mınıstrligimen, jergilikti ákimdermen birlesip atqarýymyz kerek», - dedi agenttik tóraǵasy.
Onyń aıtýynsha, jer resýrstarynyń sapalyq jaı-kúıin anyqtaý maqsatynda 1,2 mln. gektar jerge topyraqty zertteý jáne 850 myń gektar jerge geobotanıkalyq zertteý jumystary júrgizilgen. «Jalpy alǵanda qazirgi kezde, agenttik óndiristik kásiporyndarda ár jyldary júrgizilgen aýmaǵy 187 mln. gektar jerlerge topyraq zertteý jumystaryn jáne 153 mln. gektar aýmaqqa geobotanıkalyq zertteý materıaldaryn ornalastyrǵan bolatyn. Alaıda, materıaldardyń eskirýine baılanysty tıisinshe 66,1 mln. jáne 42 mln. gektar jer boıynsha túzetý jumystary júrgizýdi qajet etedi», - dedi Ó. Ózbekov.
