«Topýz» halyqaralyq festıvalinde 38 eldiń mýltıplıkatorlarynyń úzdik týyndylary anyqtalady
ASTANA. QazAqparat - Grýzııanyń Batýmı qalasy bıylǵy jyly altynshy ret anımatsııalyq fılmderdiń «Topýz» halyqaralyq festıvalin ótkizedi. Onda 38 eldiń mýltıplıkatorlary óz týyndylaryn usynady.
Festıval qonaqtarynyń nazaryna 2013-2014 jyldar aralyǵynda grýzııalyq jáne sheteldik anımatorlar jasaǵan úzdik mýltıplıkatsııalyq lentalar tanystyrylady. Festıval 6-11 qazan aralyǵynda ótedi. Onyń maqsaty - Grýzııada anımatsııalyq janrdyń damýyna septesip, sheteldik áriptestermen jańa baılanystar ornatý.
Festıval jeńimpazdary 7 atalym boıynsha anyqtalady, atap aıtqanda, «Úzdik balalar fılmi», «Eresekterge arnalǵan úzdik fılm», «Úzdik debıýt», «Úzdik telehıkaıa», «Úzdik eksperımentaldy fılm», «Balalar túsirgen úzdik fılm», «Úzdik stýdenttik fılm» atalymdary boıynsha gran-prı tabystalady. Baıqaý nomınatsııalaryndaǵy jeńimpazdardy halyqaralyq tóreshiler anyqtaıdy, al balalar túsirgen úzdik fılmdi balalar tóreshileri tańdaıdy.
Grýzııanyń anımatsııany damytý qorymen uıymdastyrylǵan festıval osy eldiń eskertkishterdi qorǵaý jáne mádenıet mınıstrliginiń qoldaýymen ótedi, dep habarlady ITAR-TASS.
