Toptyq sý qubyrlaryn damytýdy eldi mekenderdi damytý josparymen úılestire otyryp júrgizý qajet
ASTANA. KAZINFORM - Arnaýly memlekettik qordan sýmen jabdyqtaý boıynsha 230-ǵa tarta jobany iske asyrý úshin qosymsha 160 mıllıard teńgeden astam qarjy bólindi. Bul týraly Úkimet otyrysynda Premer-mınıstr Oljas Bektenov aıtty.
- Halyqty sapaly aýyz sýmen qamtamasyz etý – óte mańyzdy mindetterdiń biri. Bul másele Memleket basshysynyń tikeleı baqylaýynda. Qajetti qarajat Respýblıkalyq bıýdjette kózdelgen. Sonymen qatar zańsyz shyǵarylǵan aktıvterdi elge qaıtarý jónindegi Prezıdent tapsyrmasy aıasynda sýmen jabdyqtaý boıynsha 230-ǵa tarta jobany iske asyrý úshin arnaýly memlekettik qordan qosymsha 160 mıllıard teńgeden astam qarjy bólindi. Turǵyndardyń ómir sapasy taza aýyz sýǵa tikeleı táýeldi. Sondyqtan eldi mekenderdi sýmen qamtamasyz etý - Úkimettiń basym mindetteriniń biri, - dedi Úkimet basshysy.
Onyń atap ótýinshe, klımattyń ózgerýi, sýdy tutyný kóleminiń artýy jáne sý resýrstarynyń tapshylyǵy jaǵdaıynda zamanaýı tásilder men únemdeý tehnologııalaryn paıdalaný qajet.
- Ásirese toptyq sý qubyrlaryn damytýǵa aıryqsha nazar aýdarý kerek. Bul jumysty eldi mekenderdi damytý josparlarymen úılestire otyryp júrgizý qajet. Óıtkeni, keı jaǵdaılarda aýyl ishindegi jeliler daıyn bolǵanmen, sý kózine qol jetkizý múmkin emes. Nemese kerisinshe – aýylǵa deıin sý jelisi tartylǵan, alaıda ishki sý qubyrlary daıyn bolmaı jatady. Sondaı-aq elorda mańyndaǵy aýyldardy bir ortalyqtan beriletin sýmen jabdyqtaý máselesine de nazar aýdarǵym keledi. Sý resýrstary mınıstrligi men Aqmola oblysynyń ákimdigi atalǵan jumysty neǵurlym qysqa merzimde aıaqtaý sharalaryn qabyldasyn, - dedi Premer-mınıstr.
Buǵan deıin Oljas Bektenov iske asyrylý merzimi sozylyp ketken taza aýyz sý jobalaryn ataǵan edi.