«Topjargan» mýzykalyq jobasynyń ekinshi maýsymy bastalady
NUR-SULTAN. QazAqparat –«Habar» telearnasynda, sondaı-aq YouTube jelisindegi HabarSHOW arnasynda «Topjargan» mýzykalyq jobasynyń ekinshi maýsymy 4 qazan kúni, saǵat 21.40-ta kórermenge jol tartady, dep habarlaıdy QazAqparat.
Baıqaýdyń alǵashqy maýsymy qazaqstandyqtarmen qatar AQSh («The Four: Battle for Stardom»), Reseı («Ýspeh») jáne ózge memleketterde de jaqsy qabyldanǵan.
«Topjargan» - bul juldyz bolýǵa laıyqty tórt qatysýshy birden anyqtalatyn jalǵyz mýzykalyq shoý, ıaǵnı, baıqaýdyń fınalısteri alǵashqy kezeńde belgili bolady. Alaıda budan jobanyń qyzyǵy azaımaıdy, kerisinshe fınalıster ár shyǵarylym saıyn jańadan kelgenderdiń aldynda óziniń jobaǵa laıyq ekenin dáleldeýi kerek.
Jobanyń fınalısteri - Rınat Maltsagov (Italııada ótken halyqaralyq konkýrstyń jeńimpazy, «SuperStar KZ» jobasynyń fınalısti, «Eki juldyz» televızııalyq jobasynyń qatysýshysy, akter, óner akademııasynyń túlegi; Dinmuhammed Daýletov «X Factor», «I am Singer Kazakhstan» jobalarynyń qatysýshysy, «Qazaqstan daýysy» jobasynyń jeńimpazy; Saltanat Ashırova («Golos Ýkraıny» jobasynyń qatysýshysy, «Eles» tobynyń ánshisi)jáne Georgıı Pýtkaradze («Youth Music Fest» konkýrsynyń laýreaty, Grýzııadaǵy «X Factor»-diń jeńimpazy, «Slavıan bazary» konkýrsynyń laýrety) atandy.
Ereje boıynsha shoýǵa kelgen jańa qatysýshylar 4 fınalıstiń bireýin jekpe-jekke shaqyryp, mýzyka alańynda kúresedi. Olardyń qaısysy myqty ekenin zaldaǵy kórermender daýys berý arqyly sheshedi.
Jańa maýsymnyń taǵy bir ereksheligi «Topjargan» shoýynyń geografııalyq aýqymy keńeıip, Grýzııa, Ýkraına, Qytaı, Ázirbaıjan jáne Qyrǵyzstan Respýblıkalarynan qatysýshylar shaqyrylǵan.
Jobanyń tóreshileri – Qazaqstannyń halyq artısi – Roza Rymbaeva, ánshi, ártis – Dastan Orazbekov jáne jas reper Baller. Júrgizýshi tizginin – ánshi Madına Sádýaqasova ustaıdy.
«Topjarǵannyń» ereksheligi –ánshi sahnaǵa shyqty, nátıjesinde salǵan bir ánimen ne ótti, ne ótpedi. Kórdińiz be? Sonda ol bir ánimen búkil sheberligin kórsetý kerek, bir ánmen búkil tóreshilerdi de, kórermendi de tańqaldyra bilýi kerek. Óziniń deńgeıin kórsetip úlgerýi kerek. Sondyqtan bul úlken sheberlikti qajet etetin konkýrs», - dedi Roza Rymbaeva.
