Topyraq shógip barady: «Maıqaıyńaltynda» jedel shtab otyrysy ótti

Pavlodar oblysyndaǵy jer opyrylǵan orynda izdeý jumystary jalǵasyp jatyr. Búgin keshkisin jedel shtabtyń kezekti otyrysy ótti.

Shara barysynan óńir ákimi Asaıyn Baıhanov áleýmettik jelide beıne jazbalardan úzindi jarııa etti. Beıne jazbada sarapshylardyń munan arǵy jumys barysy jáne bolýy yqtımal táýekelder jaıyn talqylaǵanyn baıqaýǵa bolady , dep habarlaıdy Kazinform.

Jer opyrylǵan ýchaskedegi jumystar 4 qańtardan beri júrgizilip jatyr. Biraq, jumysty qarqyndy júrgizýge bolmaıdy. Óıtkeni, bul izdeý jumystaryna jumyldarylǵan mamandardyń ómirine qaýipti. Topyraq shóge túsýde. Jumysty jalǵastyrý úshin qorǵanys jıekterin jasaý qajet.

«Bul qaýipsiz jumys isteý úshin jasaý qajet. Topyraqtyń syrǵýy munan ary da tómendeı beredi. Shuńqyrdyń tómen jaǵy áli de oıyla túsýi múmkin», - dedi vıdeoda sarapshylardyń biri.

Búgin jedel shtabqa 50 jyldan astam eńbek ótili bar tájirıbeli kenshi Ivan Tereshkov qosyldy. Ol eńbek jolynyń 42 jylyn «Maıqaıyńaltyn» AQ shahtasynda ótkizgen.

«Geoskanerleý kómegimen avtobýstyń boljamdy qulaǵan jeri anyqtaldy. Onyń qulaǵan jeriniń tereńdigi qazandyq túbiniń joǵary erneýinen shamamen 5 metrdi quraıdy. Arnaýly tehnıkalar ótýi úshin endeý jumystary jalǵasyp jatyr. Sonymen qatar mamandar topyraqty qaıtadan skanerledi. Onyń nátıjesine oraı izdeý jumystary túzetiletin bolady», - dedi oblys ákimi Asaıyn Baıhanov.

Osyǵan deıin Pavlodar oblysynda ken ornynda ishinde adamdar bar avtobýs jer astyna túsip ketkenin jazdyq.

Sondaı-aq oqıǵa bolǵan jerden eki adamnyń denesi tabyldy.

Altyn kenishindegi qaıǵyly jaǵdaıǵa baılanysty polıtsııa sotqa deıingi tergeýdi bastady.