Topyraq sapasy kórsetkishterin tómendetken paıdalanýshylar jaýapkershilikke tartylady — zań jobasy
ASTANA. KAZINFORM — Topyraq jaǵdaıyna agrohımııalyq taldaý derekterin biryńǵaı bazaǵa engizbegen sharýaǵa memlekettik qoldaý kórsetilmeıdi. Bul týraly Májilistiń jalpy otyrysynda «Topyraqty qorǵaý týraly» zań jobasy men oǵan ilespe qujatty birinshi oqylymda tanystyrǵan depýtat Nurjan Áshimbetov aıtty.
— Búginde aýyl sharýashylyǵy alqaptaryn tsıfrlandyrý 100 paıyzǵa aıaqtaldy. Tsıfrlyq kartalary daıyndaldy. Zań qabyldanǵannan keıin sharýalarǵa jer telimderiniń shekarasy men ólshemderi ǵana emes, sonymen qatar topyraq sapasynyń aqparattary kórsetilgen tsıfrlyq pasporttar beriletin bolady. Bul respýblıkalyq bıýdjet esebinen júrgizilgen jerlerge agrohımııalyq, geobotanıkalyq, topyraqty zertteý boıynsha kóp jylǵy jumystardyń nátıjesinde múmkin bolǵanyn aıta ketken jón. Aldaǵy ýaqytta sharýalardyń ózderi topyraq jaǵdaıyna turaqty túrde agrohımııalyq taldaý júrgizedi. Eger taldaý derekteri biryńǵaı bazaǵa engizilmese memlekettik qoldaý kórsetilmeıdi, — dedi Nurjan Áshimbetov.
Onyń aıtýynsha, topyraq sapasy kórsetkishteriniń tómendeýi jer paıdalanýshylar úshin jaýapkershilik sharalaryna ákep soǵady.
— Keıbir jaǵdaılardy qospaǵanda, qazirgi kezde topyraq qunarlylyǵynyń nasharlaýy úshin fermerlerdiń eshqaısysy jaýapkershilikke tartylmaǵanyn atap ótkim keledi. «Topyraqty qorǵaý týraly» zańnyń qabyldanýy halyqaralyq tájirıbege sáıkes keletinin basa aıtqan jón. Eýropalyq odaq elderinde bul salada negizdemelik retteý engizilgen jáne Germanııa, Nıderland, Qyrǵyzstan, Ózbekstan sııaqty kóptegen elde topyraqty qorǵaý týraly ulttyq zańdary bar, — dedi depýtat.
Aıta keteıik, palatanyń búgingi jalpy otyrysynda topyraqty qorǵaý, jol qaýipsizdigin tsıfrlandyrý, ańshylyq salasyn retteý, janýarlar dúnıesin saqtaý máselelerine qatysty zań jobalary talqyǵa salynady.
