Topaı asyq jınaǵan aqtóbelik kollektsıoner Gınness rekordtar kitabyna engisi keledi

AQTÓBE. KAZINFORM – Aqtóbe qalasynyń turǵyny Erbolat Qýanyshov 13 jyldan beri topaı asyq jınap júr. Jıǵany 3 myńnan asty. Ol Gınness rekordtar kitabyna ený úshin qujat jınaýǵa kiristi.

Sharýa Erbolat Qýanyshovtyń bir-eki asyǵy 13 jylda 3400-ge jýyqtady. Qazir ózi turatyn úıdiń saraıyn sheberhana etip, kelýshilerge arnap kórme jasaqtap qoıǵan. Іshinde qoıdyń asyǵy, topaı asyqtan bastap, túrli jilikten jasalǵan shejire jınaǵyn, qabyrǵa men omyrtqa, jaýyryn men múıizden aspaly sham jasaǵan. 

— 2012 jyly asyq sany kóbeıip, 2017 jyly EKSPO-ǵa qatysýǵa usynys tústi. Ol kezde asyq sany az boldy, buzaýly sıyr músinin jasaý týraly oıym iske aspady. Qazirgi kezde 3378 asyq bar. Adamdar kelip, qyzyqtap, tamashalaıdy. Ózim sharýa ıesimin. Sıyrdyń barlyq súıegin kádege jaratamyn. Máselen múıizinen qymyzǵa ydys, qabyrǵasynan aspaly sham, terisin ılep, qamshyǵa qaıys jasaýǵa bolady. Al asyq jınaý — hobbıim, — dedi Erbolat Qýanyshov. 

Sharýa súıekti tazartýdyń ádisin sheber meńgergen. Ol qolyna túsken topaıdy tońazytqyshqa sala beredi. Sany 40-50-ge jetkende qazanǵa salyp, 5-6 saǵat qaınatady. Maıy shyqqan soń ony jýyp-shaıyp alady. Kepken soń ǵana túrli dúnıe jasaýǵa bolady. 

Foto: Elmıra Kóshekbaı

— Asyqtan asyqtyń músinin jasaǵym keledi. Sóıtip «Asyǵyń alshysynan tússin!» dep jazbaqpyn. Músinniń bıiktigi 1,5 metr, uzyndyǵyn odan kóp bolady. Asyqtan taq ta jasaǵym keledi. Sonymen birge buzaýly sıyr jasamaqpyn. Qazir ınternetti ashyp qalsa, múmkindik mol. Qarap otyryp, túrli zat jasaýǵa bolady. Sonymen birge túıeniń súıeginen úlken aspaly sham jasaǵym keledi. Jylqy, sıyr súıeginen shejire jasaımyn, — dedi Erbolat Qýanyshov.

Qazaqstan barysy, Aqtóbe barysy jarystarynda jerebe tartý úshin sheberdiń jıǵan asyǵy paıdalanylady. Sonymen birge aýdan, aýyldar da alady.

— Gınness rekordtar kitabyna engim keledi. Bul jetistik ári adamdy yntalandyratyn sertıfıkat bolar edi. Qazir qujattaryn jınap jatyrmyz. Eki aı buryn hat joldaǵan edik. Asyqty satyp alǵysy keletin adamdar boldy, biraq jıǵan eńbegim bar, satpadym, — dedi kollektsıoner.

Eske salsaq, Aqtóbede mektep oqýshylary arasynda asyq atý oıyny keń tarap keledi. Qazir birneshe mektepte asyq úıirmesi tegin ótkiziledi.