Topaı asyq jınaǵan aqtóbelik Qazaqstan rekordtar kitabyna endi
AQTÓBE. KAZINFORM – 3 myńnan astam topaı asyǵyn jınaǵan aqtóbelik Erbolat Qýanyshov Qazaqstan rekordtar kitabyna endi. Ol Gınness rekordtaryn jańartyp, jınaǵan asyǵynan úlken músin jasaýdy armandaıdy.
Kollektsıoner Erbolat Qýanyshovta Qazaqstan rekordtar kitabyna engeni týraly sertıfıkat bar. Onda «Kýálik Aqtóbe oblysynyń týmasy ulttyq ónerdi ulyqtaýdy maqsat etip, óz sheberhanasynda on eki jyl boıy sıyr asyǵyn jınaýmen aınalysyp, 3 378 asyq jınaǵan Erbolat Qýanyshovqa KInES qazaqstandyq rekordtar kitabynyń keıipkeri retinde beriledi» dep jazylǵan.
Sonymen birge QR Asyq atý federatsııasynyń prezıdenti A.Sultanov asyq atý sportyn damytýǵa qosqan úlesi úshin «Altyn saqa» tósbelgisimen marapattady.
- Gınness kitabyna ený úshin resmı saıtyna kirip, suranys joldap otyrmyz. Úsh aıdan soń ǵana habaryn aıtady eken. Men buǵan deıin topaı asyqtyń bárin ózim jınadym. Endi aınalamnan da alsam deımin. Álemdik rekordty jańartqan soń oblys ortalyǵyna asyqtan músin jasaǵymyz keledi. Ol alyp asyqtyń da, sıyrdyń da músini bolýy múmkin. Mundaı eshkimde joq,- dedi Erbolat Qýanyshov.
Eske salsaq, sharýa Erbolat Qýanyshovtyń bir-eki asyǵy 13 jylda 3400-ge jýyqtady. Qazir ózi turatyn úıdiń saraıyn sheberhana etip, kelýshilerge arnap kórme jasaqtap qoıǵan. Іshinde qoıdyń asyǵy, topaı asyqtan bastap, túrli jilikten jasalǵan shejire jınaǵyn, qabyrǵa men omyrtqa, jaýyryn men múıizden aspaly sham jasaǵan.