Topar kentinde quny 56 mlrd teńgelik jańǵyrtý baǵdarlamasy júzege asyrylýda - Qaraǵandy oblysy
QARAǴANDY. QazAqparat - Qaraǵandy oblysynyń ákimi Erlan Qoshanov jumys saparymen Abaı aýdanynda bolyp qaıtty. Topar kentinde aımaq basshysy Basty taratýshy energııa stantsııasynda (BTES) bolyp, qysqa daıyndyq qalaı júrip jatqanyn kórdi, dep habarlaıdy óńir basshysynyń resmı saıty.
1964 jyldan beri jumys istep kele jatqan stantsııa jylý jáne elektr qýatymen Abaı qalasy men Topar kentin qamtamasyz etip otyr. Sondaı-aq óndirilgen elektr energııasy Qaraǵandy, Jezqazǵan jáne Balqash aımaqtaryndaǵy «Qazaqmys» korporatsııasy kásiporyndarynyń júktemesin jaýyp otyr. BTES-da 16 qazandyq jáne 8 týrbo agregattar jumys isteıdi, bekitilgen elektr qýatylyǵy 613 MVt, jylý qýaty - 300 Gkal/saǵ quraıdy. Stantsııada 1265 adam qyzmet etedi.
Bıylǵy jyly Topar BTES jylytý maýsymyna daıyndaý úshin 3,1 mlrd teńge bólingen, onyń ishinde negizgi jáne qosalqy qurylǵylarda kúrdeli jóndeý ótkizý úshin - 1,5 mlrd teńge, aǵymdaǵy jóndeý jumystaryna - 1,6 mlrd teńge qarastyrylǵan. Kásiporyn basshylarynyń málimdeýinshe, jóndeý jumystary kestege saı júrgizilip jatyr jáne de jumystar bekitilgen merzimde aıaqtalady.
Sonymen qatar energııa stantsııasynda 2026-shy jylǵa deıin shaqtalǵan jańǵyrtý baǵdarlamasy júzege asyrylyp jatyr. 2012-2016 jyldary jalpy somasy 3,4 mlrd teńgeni quraǵan birqatar ınvestıtsııalyq jobalar júzege asyrylǵan bolatyn. Eki jyl buryn energetıkter qazandyq jáne týrbınalyq agregattardy aýystyrýǵa kirisken. Eki jańartylǵan agregattardy 2018-shi jyldyń qazan-qarashasynda iske qosý josparlanyp otyr.
Aǵyymdaǵy jyly qurylǵylardy jańǵyrtýǵa 11,8 mlrd teńge baǵyttalǵan. Barlyǵy BTES-da 6 qazandyq pen 4 týrbına aýystyrylady. Esepteýler boıynsha, jobalardyń jalpy quny 56,8 mlrd teńgeni quraıdy.
- Stantsııada qazirgi tańda aýqymdy jumystar atqarylyp jatyr. Jańǵyrtý baǵdarlamasy úzdiksiz jumys atqarý rejıminde iske asyrylýda. Bizde zamanaýı qazandyq pen sońǵy býyn tehnıkasy bolyp tabylatyn týrbınalyq qurylǵy ornatylyp jatyr. Basqarma tolyǵymen avtomattandyrylǵan bolady, - dep atap ótti «BTES Topar» JShS dırektory Vladımır Cherepanov.
Jańa týrbogenerator buryńǵysyna qaraǵanda úsh ese kúshti, onyń qýattylyǵy - 130 MVt. Jalpy jańǵyrtý jumystary 2024-2026 jyldarǵa qaraı energııa stantsııasynyń qýattylyǵyn 833 MVt-qa deıin ulǵaıtýǵa múmkindik beredi.
Tsehtardy qarap shyqqan soń Erlan Qoshanv «Krporatsııa Qazaqmys» JShS, basqarý kompanııasynyń jáne «Qazaqmys Enerdjı» JShS basshylyqtarymen jınalys ótkizdi. Basqosýda energonysandardyń aldaǵy jylytý maýsymyna daıyndyǵy talqylandy: «BTES - Topar», Jezqazǵan jáne Balqash JEO, sondaı-aq ınvestıtsııalyq baǵdarlamalardyń atqarylýy da talqyǵa tústi. Bıýdjettik uıymdarǵa kómir jetkizý týraly esep berildi. Qatysýshylar tarıftik saıasat máselesin ortaǵa saldy.
- Bul turǵyndar úshin erekshe másele. Ár qadamdardy oılanyp isteý qajet - sebepsiz baǵa kóterýlerge jol bermeý kerek, - dep atap ótti Erlan Qoshanov.
Oblys ákimi Toparda jylýdy esepteý quraldaryn ornatýǵa qatysty, jylytý maýsymyna daıyndyq barysyn baqylaý máselelerin kóterdi. Taǵy bir tapsyrma Ult jospary - 100 naqty qadamnyń 51-shi qadamy «AEK irilendirý» oryndaýǵa qatysty boldy. Barlyq ıesiz qalǵan jáne kommýnaldyq jelilerdi energııa taratýshy uıymdarǵa berý qajet.
