TOP-5: Qazaqstandyqtar qandaı avtokólikterdi kóp satyp alady
ASTANA. QazAqparat - Qazaqstandyq avtobıznes qaýymdastyǵy osy jyldyń mamyr men maýsym aılaryndaǵy kórsetkishterdi salystyra otyryp, Qazaqstanda jańa avtokólikterdiń satylymy 5 paıyzǵa óskenin jarııa etti, dep habarlaıdy QazAqparat tilshisi qaýymdastyqtyń baspasóz qyzmetine silteme jasap.
Qazaqstandyq dıllerler maýsym aıynyń ishinde 5314 jeńil avtokólik pen jeńil kommertsııalyq tehnıkalardy, 249 aýyr júk kóligi men avtobýsty satyp úlgergen. 2018 jyldyń alǵashqy jartyjyldyǵynyń qorytyndysy boıynsha (2017 jyldyń qańtar - maýsym aılarymen salystyrǵanda), naryq 35,7 paıyzǵa nemese 27162 avtokólikke ulǵaıǵan.
«Satylymy eń joǵarǵy jeńil avtokólikterdiń markalary boıynsha ekinshi aı qatarynan Toyota (1437 avtokólik) kósh bastap tur. Alty aıdyń ishinde atalǵan markanyń 5599 kóligi satylǵan. Ekinshi orynda - Lada. Bir aıdyń ishinde qazaqstandyqtar 1184 Lada markaly kólikti satyp alǵan. Dese de, alty aıdyń qorytyndysy boıynsha Lada báribir birinshi orynda - jyl basynan beri atalǵan markadaǵy 5 879 kólik satylǵan. Úshinshi oryn Qostanaıda shyǵarylatyn Hyundai markasyna (760 kólik satylǵan) tıesili. 2018 jyldyń qańtar-maýsym aılarynyń ishinde qazaqstandyqtar Hyundai markaly 3 398 kólikti mingen. Alty aıdyń ishinde 1709 kóligi satylǵan Ravon men bir aıda 242 kóligi satylǵan (alty aıdyń ishinde 1269 kólik satylǵan) Kia tórtinshi orynda. Bestikti bir aıda 227, alty aıda 919 kóligi satylǵan Nissan túıindeıdi», - delingen habarlamada.
Sonymen birge, zor suranysqa ıe kólik markalarynyń tiziminde Renault (bir aıda 183, alty aıda 712), JAC (bir aıda 147, alty aıda 673), Lexus (bir aıda 129, alty aıda 593), Volkswagen (bir aıda 104, alty aıda 599, UAZ (bir aıda 101, alty aıda 579) tur. Modelderdi tańdaý kóshinde burynǵysha barlyǵynyń aldynda Toyota Camry eshkimge esesin beretin emes.
