TOP-5: Qazaqstan 2020 jyly barýǵa tıisti elderdiń qataryna endi
«Atalǵan qoǵamnyń reıtıngisine sáıkes álemniń túkpir-túkpirinen «adventure tourism» salasynyń sarapshylary daýys berý nátıjesi boıynsha Qazaqstan «must visit» elderdiń arasynda 5-shi orynǵa jaıǵasty. Keń dala, bıik taýlar men shólder eli dep tanylǵan Qazaqstan - Ortalyq Azııanyń asyl marjany» delingen reıtıng sıpattamasynda. Reıtıng avtorlary Qazaqstanda týrızm salasyn damytýdyń jańa deńgeıine jetý úshin bekpekerlerge qyzyqty Ústirt, Bozjyra, Altaı taýy aımaqtaryn damytýda qosymsha kúsh salýǵa keńes berdi», - dep habarlaıdy ulttyq kompanııa.
Habarlamada aıtylǵandaı, brıtandyq «Backpacker» qoǵamy bizdiń elden bólek, saıahattaýǵa Ózbekstan, Bosnııa men Gertsegovına, Reseı, Efıopııa jáne Ázerbaıjan elin usynady.
«Reıtıngige ilingen elderdiń tizimi jýyq arada jaryq kórip, onda úzdik tórttike engen elder týraly málimetti tolyq bilýge múmkindik týmaq. Sońǵy derekterge sáıkes, adventure tourism jastar arasynda keńinen damyp, asa tanymaldyqqa ıe bolyp keledi. Mundaı saıahattaý álem astanalaryn aralaýdy qol jetimdi etip, jıhangezderge zerttelmegen baǵyttardy ashyp, biregeı tájirıbe jınaqtaýǵa sebep bolady», - delingen aqparatta.
Aıta keteıik, atalǵan reıtıng 2010 jyldan beri júrgizilip keledi, al uıymdastyrýshy qoǵam oqıǵaly-shytyrman týrızmdi damytýǵa jaǵdaı jasaý maqsatynda 2009 jyly qurylǵan.
