TOP-5: eń kóp satylǵan jańa kólikterdiń tizimi jasaldy
ASTANA. KAZINFORM — Bıyl qyrkúıekte elde jańa avtokólikter saýdasy 5,2 paıyz ósti. Bul týraly Qazaqstannyń avtokólik odaǵy (QAO) málim etti.
- 2026 jylǵy qyrkúıekte resmı dılerler 19 309 jańa jeńil jáne kommertsııalyq avtokólik satty, bul byltyrǵy qyrkúıektegiden (18 353 kólik) 5,2 paıyz kóp. Tamyzben salystyrǵanda, saýda 1,1 paıyz ósti. Qańtar–qyrkúıek qorytyndysy boıynsha 165 678 jańa avtokólik satyldy. Bul 2025 jyldyń sáıkes kezeńimen salystyrǵanda (161 449 kólik) 2,6 paıyzǵa artyq, - dep atalyp ótken Qazaqstannyń avtokólik odaǵy málimetinde.
QAO prezıdenti Anar Maqashevanyń aıtýynsha, qazir Qazaqstandaǵy avtosalondarda jańa avtokólikti satyp alýdy jeńildetetin túrli tetikter men klıentterdi qoldaý baǵdarlamalarynyń keń spektri bar.
- Standartty avtonesıeden bólek, satyp alýshylar óndirýshiler men dılerlerdiń arnaıy usynystaryn, sonymen qatar trade-in baǵdarlamasyn paıdalana alady. Mundaı quraldar suranysty saqtap, el avtoparkiniń jańarýyna yqpal etedi, - dep túsindirdi ol.
Eń kóp satylǵan brend
2026 jylǵy qyrkúıekte 3 067 avtokólik nátıjesimen birinshi oryndy Chevrolet aldy (+4,2%). Ekinshi qatarda 2 932 avtokóligi ótken Hyundai tur (-29,5%). Úshinshi satyǵa Kia jaıǵasty – 2 584 avtokólik (+29,1%).
Al tórtinshi oryndaǵy Changan-nyń saýdasy 127,1 paıyzǵa artyp, 1 501 avtokólikke jetti. Bestikti 1 179 avtokólikpen Chery túıindedi (+28,3%).
Sonymen qatar osy ondyqtyń tiziminde Haval (1 171 kólik satyldy; +88,9%), Toyota (1 150 kólik; +0,4%), Jetour (900 kólik; -1,3%), Geely (636 kólik; -26,4%) jáne BYD (560 kólik; +32,4%) bar.
Qyrkúıek aıynda kóp satylǵan tanymal modelder qatarynda:
- Chevrolet Cobalt – 2 906 avtokólik;
- Kia Sportage - 1 187;
- Hyundai Tucson – 985;
- Hyundai Mufasa – 899;
- Kia Soluto – 577;
- Toyota Camry - 532;
- Hyundai Elantra – 508;
- Haval Jolion – 479;
- Changan CS35 MAX - 458;
- Changan CS75 Plus - 429.
Atap aıtqanda, toǵyz aı qorytyndysy boıynsha birinshi orynda 27 495 avtokóligi satylǵan Hyundai (-22,7%) tur. Ekinshisi – 26 272 avtokóligi ótken Chevrolet (+14,7%). Úshinshi oryndy Kia aldy – 18 964 avtokólik (+7,8%). Tórtinshi orynda Changan – 15 645 avtokólik (+104,2%). Úzdik bestikti 11 994 avtokólikpen Chery túıindedi (+17,4%). Odan keıin Haval (9 656 kólik; +16,3%), Jetour (8 668 kólik; -16,7%), Toyota (7 287 kólik; -5,2%), JAC (6 771 kólik; -8,3%) jáne Geely (5 245 kólik; -30,4%) tur.
Qazaqstanda jeńil avtokólik óndirisi artty
2026 jylǵy qańtar-qyrkúıek aılarynda 136 548 jeńil avtokólik óndirildi. Bul 2025 jyldyń sáıkes kezeńimen salystyrǵanda 38 paıyzǵa joǵary.
Ulttyq statıstıka bıýrosynyń baspasóz qyzmetiniń deregine sáıkes, qyrkúıek aıynda 19 377 jeńil avtokólik shyǵaryldy. Óndiris kólemi ótken jyldyń osy aıymen salystyrǵanda 66,4%-ǵa, al aǵymdaǵy jyldyń tamyz aıymen salystyrǵanda 35,5%-ǵa kóp.
— Qazaqstanda avtokólik óndirýmen 12 kásiporyn aınalysady. Jeńil avtokólik óndirisiniń negizgi kólemi Almaty qalasy men Qostanaı oblysyna tıesili. Olardyń úlesi tıisinshe 50,5% jáne 49,5%-dy quraıdy, — delingen statıstıkalyq málimetterde.
2026 jylǵy qańtar-qyrkúıek aılarynda «Avtokólikter, tirkemeler jáne jartylaı tirkemeler» sanaty boıynsha ónerkásip óniminiń kólemi aqshalaı mánde 1,67 trln teńgege jetti. Osy sanattaǵy ónerkásip óndirisiniń ındeksi ótken jyldyń sáıkes kezeńimen salystyrǵanda 129,9% deńgeıinde qalyptasty.
2026 jylǵy qyrkúıekte óndirilgen ónim kólemi 198,4 mlrd teńge boldy. Bul kórsetkish aqshalaı mánde 2026 jylǵy tamyzben salystyrǵanda 25,7%-ǵa, al 2025 jylǵy qyrkúıekpen salystyrǵanda 10,5%-ǵa ósti.
Buǵan deıin habarlanǵandaı, osy jyly Ónerkásip jáne qurylys mınıstri Ersaıyn Naǵaspaev avtokólik óndirisi salasynyń qarqyndy damyp kele jatqanyn málimdedi.
Sońǵy 5 jylda salaǵa 457 mıllıard teńgege jýyq ınvestıtsııa tartyldy. Ótken jyly 171 myńnan astam avtokólik shyǵarylyp, óndiris kólemi 18%-ǵa artty. Bul oń dınamıka bıyl da saqtalyp otyr. Bıylǵy jospar — óndiris kólemin 11%-ǵa arttyryp, 190 myń kólik shyǵarý. Jalpy bıyl avtomobıl shyǵarý salasy 131,1%-ǵa ósti.
