TOP-10: Sheteldik týrısterge Qazaqstannyń qandaı óńirleri tartymdy
ALMATY. KAZINFORM - Byltyr Almaty oblysynda keletin týrıster aıtarlyqtaı artqan, al Shymkent qalasy men Aqtóbe oblysynda bul kórsetkish tómendedi.
Kazakh Tourism kompanııasy «eQonaq» júıesine tirkelgen ornalastyrý oryndary boıynsha málimetterdi taldap, sheteldik týrıster arasynda tanymal qazaqstandyq óńirlerdi anyqtady. Ótken jyldyń úzdik úshtigi 2023 jylmen salystyrǵanda ózgerissiz qaldy.Taldaý «eQonaq» aqparattyq júıesine tirkelgen 525 myńnan astam paıdalanýshynyń derekterin qamtydy.
Zertteý qorytyndysy boıynsha Almaty sheteldik týrıster úshin eń tanymal qazaqstandyq qala mártebesin saqtady. 2024 jyly ońtústik astana 534 340 sheteldik qonaqty qabyldaǵan. Ótken jylmen salystyrǵanda megapolıske kelgen saıahatshylar sany 70 myńǵa jýyq adamǵa artty.
Reıtıngtiń ekinshi satysyna elorda jaıǵasty. 2024 jyly «eQonaq» júıesine tirkelgen 269 320 sheteldik meıman Astanada toqtaǵan.
2023 jylmen salystyrǵanda 2024 jyly Almaty oblysynda sheteldik týrıster sany 59%-ǵa artyp, 134 763 adamǵa jetti. Bul nátıjesiniń arqasynda Almaty oblysy eń tartymdy qalalar tiziminde úzdik úshtikke endi.
Atyraý jáne Mańǵystaý oblystary tórtinshi jáne besinshi oryndardy ıelendi. Munaıly óńirge ótken jyly 106 974 sheteldik týrıst kelse, Mańǵystaý oblysy 71 462 sheteldik qonaqty qabyldady (2023 jyly – 67 633 adam).
Qaraǵandy oblysynyń sheteldik týrıster úshin tartymdylyǵy arta tústi. Aımaq reıtıngte birden úsh satyǵa kóterilip, altynshy oryndy ıelendi. 2024 jyly óńirge 50 474 sheteldik týrıst keldi, bul ótken jylmen salystyrǵanda 35%-ǵa artyq.
Al Aqtóbe oblysy 2023 jylmen salystyrǵanda bir saty tómendedi. Onda sheteldik qonaqtar sany shamamen 1500 adamǵa azaıyp, 45 063 týrıst boldy.
Tizimniń segizinshi jáne toǵyzynshy oryndaryna Aqmola jáne Jambyl oblystary jaıǵasty. Bul eki óńirde de 2024 jyly sheteldik týrıster sanynyń ósýi baıqalady. Aqmola oblysy 44 976 sheteldik qonaqty qabyldasa, Jambyl oblysynda bul kórsetkish 44 226 adamǵa jetti.
Onynshy oryndy úsh saty tómendegen Shymkent qalasy ıelendi. «eQonaq» júıesiniń derekteri boıynsha, 2024 jyly megapolıstiń ornalasý oryndaryna 39 887 sheteldik týrıst toqtaǵan. Bul kórsetkish 2023 jylmen salystyrǵanda shamamen 900 adamǵa az.
Eske salaıyq, buǵan deıin 2025 jyly Almatyda týrızmdi damytý úshin ne isteletinin jazǵanbyz.
