TOP-10: Qazaqstandyqtar qandaı markaly avtokólikterdi satyp alýda
ASTANA. QazAqparat - Qazaqstandyq avtobıznes qaýymdastyǵy qazan aıynda Qazaqstannyń avtonaryǵynda avtokólikterdiń qandaı markalary basym suranysqa ıe bolǵanyn jarııa etti, dep habarlaıdy QazAqparat tilshisi.
«Qazaqstanda sońǵy aılarda jańa avtokólikter belsendi túrde satylyp jatyr. Eldegi dıllerler qazan aıynda 5464 jeńil avtokólik pen jeńil kommertsııalyq tehnıka, sonymen birge 350 júk kóligi men avtobýs satqan. 2018 jyldyń 10 aıynyń qorytyndysy boıynsha naryq jańa satylǵan 49 514 avtokólikpen tolyqty (ótken jyldyń qańtar-qazan aıynda 39 141 avtokólik satylǵan, ıaǵnı bıylǵy kórsetkish 27 paıyzǵa joǵary)», - dep habarlaıdy qaýymdastyqtyń baspasóz qyzmetinen.
Elimizdegi eń kóp satylatyn jeńil avtokólikterdiń markasy boıynsha kóshti Lada (1 151, qyrkúıekke qaraǵanda 13,3 paıyzǵa az) bastap tur. Ekinshi orynda satylǵan 1040 kóligimen Toyota turaqtaǵan. Degenmen, japon markasy boıynsha jyl basynan beri 10 209 avtokólik (+33,7%) satylǵan. Kóshbasshy markalarǵa qostanaılyq Hyundai jaqyndap, qazan aıynda satylǵan 900 kóligimen úshtikti túıindeıdi. Sonymen qatar, tórtinshi orynǵa Kia (435), besinshi orynǵa Nissan (272), altynshy orynǵa Ravon (qazan aıynda bul markada kólik satylmasa da, jyl basynan beri 1727 kólik saýdalanǵan) turaqtaǵan. 283 kóligi satylyp ketken Renault jetinshi orynnan kórinse, úzdik ondyqta - Volkswagen (175; -32,7%), Lexus (167; -6,7%) jáne JAC.
