Tonykók jazýy bizge hat túrinde jetip otyr - Nápil Bazylhan
; ALMATY. Aqpannyń 25-i. QazAqparat /Názıra Eleýhan/ - Búgin QR Memlekettik ortalyq murajaıynda «Hattar zaman aǵymynda» atty kórme ashyldy,
dep habarlaıdy QazAqparat.
Kórmege qola dáýirden bastap, búgingi kúnge deıingi arab, latyn jáne kırıll qaripterinde jazylǵan ár túrli hattar qoıylǵan. Tuńǵysh ret kórmege HІІІ-HІV ǵasyrlardaǵy Altyn Orda handary - Toqtamys pen Temir Qutylyqtyń, XVIII-XIX ǵasyrlardaǵy qazaq handary men sultandary Abylaı, Ábilpeıiz, Kenesary handardyń tarıhı hat-qujattarynyń kóshirme nusqalary, sonymen qatar qazaqtyń zııaly tulǵalary A.Qunanbaevtyń, Sh.Ýálıhanovtyń, Á.H.Marǵulannyń, M.Áýezovtyń hattary da qoıylǵan. Ár ýaqyt kezeńinde habarlasý, tildesý quraly retinde qoldanylǵan Morze apparaty, jazý mashınkasy jáne taǵy da basqa hat-habar almasýdyń túrleri qoıylǵan.
«Bul kórmeni 2 jyl daıyndap, búgin mine, kórmege 150-den asa hattar men eksponattar qoıdyq. Birinshi ret, bul kórmege úsh hannyń aqyldy keńesshisi, «Tonykók» danyshpanǵa arnalǵan tastyń ǵylymı kóshirmesin usynyp otyrmyz. Bul tasqa qashalǵan jazýdy Tonykóktiń ózi 728 jyly jazǵan bolatyn, ol jazý bizge hat retinde kelip otyr. Bul nusqa - hattyń erekshe nusqasy», dedi murajaılyq derektaný jáne qoljazba ortalyǵynyń jetekshisi Nápil Bazylhan. Hattar kórmesine sonymen qatar, jartastaǵy jazýlar, petroglıfter qoıylǵan.
