Tonykók pen Terkin eskertkishteriniń kóshirmeleri Eýrazııa ulttyq ýnıversıtetiniń atrıýmyna qoıylady
ASTANA. Aqpannyń 24-i. QazAqparat /Ernur Aqanbaı/ - Mońǵolııa jerindegi Tonykók pen Terkin eskertkishteriniń kóshirmeleri L. Gýmılev atyndaǵy Eýrazııa ulttyq ýnıversıtetiniń atrıýmyna qoılatyn bolady.
Bul týraly búgin Astanada ótken 2009-2011 jyldarǵa arnalǵan «Mádenı mura» Ulttyq strategııalyq jobasyn júzege asyrý jónindegi Qoǵamdyq keńestiń kezekti otyrysynda Mádenıet jáne aqparat mınıstri Muhtar Qul-Muhammed aıtty, dep habarlaıdy QazAqparat.
«Ulttyq tarıhı murany halyqaralyq deńgeıde nasıhattaý baǵyty aıasynda biz mońǵol jerine baryp, Tonykók pen Terkin eskertkishteriniń kóshirmesin jasatqyzdyq. Eskertkishterdiń kóshirmeleri Qazaqstanǵa jetkizildi. Barlyǵy bir jerde bolsyn degen nıetpen olardy Kúltegin eskertkishiniń kóshirmesi ornalastyrylǵan Eýrazııa ýnıversıtetiniń atrıýmyna qoıý jóninde sheshim qabyldandy», dedi otyrysta M. Qul-Muhammed.
Mınıstrdiń aıtýynsha, Tonykók pen Terkin eskertkishteri kóshirmeleriniń resmı ashylý saltanaty aldaǵy bir-eki aıdyń ishinde ótetin bolady.
