Tonı Bler mınıstrler men ákimderge memlekettik basqarýdyń tıimdi tetikterin atap berdi
ASTANA. 29 mamyr. QazAqparat - Búgin Ulybrıtanııanyń burynǵy premer-mınıstri Tonı Bler Astanada memlekettik basqarý isiniń qyr-syry jaıynda baıandap, mınıstrler men ákimder aldynda dáris oqydy.
QR Prezıdenti janyndaǵy Memlekettik basqarý akademııasynda ótken dáris barysynda Ulybrıtanııanyń burynǵy Úkimet basshysy Tonı Bler transformatsııalyq ózgeristerdi júrgizýdiń birneshe baǵyttaryn atap berdi.
«Birinshisi - basymdyqtardy durys ornalastyrý. Óz tájirıbem kórsetkendeı, sizder tek 4 nemese 5 aýqymdy, jahandyq baǵyttardy júzege asyra alasyzdar. Sózsiz, Úkimet qoıylǵan mindetterdiń barlyq dıapazonyn qamtýy tıis. Al memlekettik bıliktegi kóshbasshy basymdyqtardy qoıa bilýi shart. Bul másele saıası basshylar úshin asa mańyzdy. Ekinshisi - sizder basymdyqtardy ornalastyrǵannan keıin, atalǵan ózgeristerdi qamtamasyz etý úshin tıisti saıasatty jasaqtaýlaryńyz kerek. Saıasatty jobalaý jumysy da óte saýatty bolý qajet. Óıtkeni alǵa qoıǵan maqsattar óte jaqsy bolýy múmkin, biraq saýatty saıasatsyz sizder qajetti nátıjelerge qol jetkize almaısyzdar», - dep atap kórsetti saıasatker.
Onyń aıtýynsha, saıası jospardy qurýda memlekettik basqarýdaǵy basshylar ýaqyttaryn aıamaı shyǵyndaýǵa týra keledi.
«Basymdyqtar aıqyndalyp, saıasat qurylǵannan keıin, eń iri jumystardyń biri - olardyń iske asyrylýy, ómirge keltirilýi bolmaq. Eger sizder ózgeristerdi júzege asyrýdy qolǵa alǵyńyz kelse, sizge atalmysh ózgeristerdi baqylap, monıtorıng jasaýǵa múmkindik beretin tetikter qajet. Ol sizderdiń memlekettik basqarýshylardyń tıimdiligin baqylaýǵa da múmkindik beredi. Monıtorıng jasaýǵa sizge damý úderisteri týraly shynaıy aqparat kerek», - dedi T.Bler.
Onyń atap kórsetkenindeı, sonymen qatar jobalardy tıimdi júzege asyrý barysynda kadrlyq áleýet te zor ról atqarady. «Ózgeristerdi qamtamasyz etý úshin, kadrlyq ózgeristerdi de atqarý qajet. Olardy qaıta daıarlyqtan ótkizýge qarjy men ýaqytty aıamaý kerek», - dep túıdi sózin T.Bler.
Semınar ákimshilik reformany iske asyrý kezinde ozyq basqarýshylyq sheshimderdi qabyldaý jáne olardyń «Qazaqstan-2050» Strategııasyna sáıkes eldiń damýy men básekege qabilettiligine baǵdarlaný máselelerine arnalǵan. Oǵan ortalyq atqarýshy organdardyń basshylary, vıtse-mınıstrler men ákimder, olardyń orynbasarlary men kórnekti saıası qaıratkerler qatysty.
