Tonı Bler eldiń ınvestıtsııalyq tartymdylyǵyn arttyryp, memleket qarjysy únemdeýge yqpal etetin bolady - SІM
ASTANA. 24 qazan. QazAqparat /Aıdar Ospanalıev/ - «Jahandaný zamanynda tájirıbeli sheteldik keńesshilerdi tartý - búkilálemdik tájirıbe bolyp esepteledi.
Osyny eskere otyryp jáne elimizdiń
sátti damýyna qolǵabys etý maqsatynda kóptegen sheteldik memleket qaıratkerleri Qazaqstannyń ekonomıkalyq saıasat pen memlekettik basqarý, halyqaralyq saıasat sııaqty baǵyttar boıynsha keńes berýge nıet bildirdi. Osyndaı azamattardyń arasynda Ulybrıtanııanyń burynǵy Premer-Mınıstri Tonı Bler de bar»,-dep málimdedi búgin Syrtqy ister mınıstrliginiń resmı ókili Altaı Ábıbýllaev jýrnalıstermen bolǵan aptalyq brıfıngte.
Onyń sózine qaraǵanda, sheteldik keńesshilerdiń kómegine júginýge baǵyttalǵan tájirıbe - bul sharanyń mańyzdy ári naqty nátıje berip otyrǵandyǵyn kórsetti. «Mysaly, sheteldik keńesshiler eldiń ınvestıtsııalyq tartymdylyǵyn arttyryp, eldiń ári qaraı erekshe qarqynmen damýyna áser etetin zamanǵa saı zańdar qabyldaýǵa yqpal etedi. Úkimettiń keńesshi retinde Tonı Blerdi tańdaýy memleket qarjysyn aıtarlyqtaı únemdep, eldiń ınvestıtsııalyq jaǵdaıy ońaltylyp, jańa jumys oryndary ashylady, osyǵan qaraı memleket qorjynyna túsetin qarjy da arta túsedi degen senim bar. Sonymen qatar, eldegi memlekettik baǵdarlamalar da tıimdi iske asyrylady»,-dedi resmı ókil.
